Ўзбекистоннинг Қозондаги Бош консулхонаси кўмагида Татаристон ҳудудида содир бўлган йўл-транспорт ҳодисаси натижасида оғир тан жароҳати олган ўзбекистонлик ва унинг онаси ватанга қайтарилди.
Мамлакатнинг Қозон шаҳридаги Бош консулхонаси маълумотига кўра, 1 сентябрь куни Татаристон ҳудудидан ўтувчи Азнакаево–Алметевск трассасида Ўзбекистон фуқаролари иштирокида йўл-транспорт ҳодисаси содир бўлган. Ушбу ҳодиса оқибатида Ўзбекистон фуқароси Т.Ж. оғир тан жароҳати олган ва у Алметевск туманлараро кўп тармоқли шифохонасига ётқизилган.
Беморнинг онаси ўғлини Ўзбекистонга олиб кетиш учун молиявий кўмак сўраб, Бош консулхонага мурожаат қилган. Ўзбекистон дипломатлари жабрланган юртдошга барча турдаги консуллик-ҳуқуқий ва амалий ёрдам кўрсатди. Хусусан, шифокорлар ва бошқа идоралар билан зарур учрашувлар ўтказилди ҳамда ҳолат доимий назоратга олинди.
Шунингдек, мазкур ариза асосида Бош консулхона ходимлари томонидан бемор Т.Ж.ни мамлакатга қайтариш учун зарур ҳужжатларни тайёрлаш ишлари амалга оширилди.
Натижада Т.Ж. ва унинг онасига Қозон–Тошкент авиақатновига чипта олиб берилди ва улар 26 сентябрь куни ватанга қайтарилди.
Бундан аввал Туркиянинг Истанбул шаҳрида ўз қизи томонидан қийин аҳволда қолдирилган аёл ва унинг ўғли Ўзбекистонга қайтарилган эди. Шунингдек, Истанбулда пулсиз ва ҳужжатсиз қийин аҳволда қолган ўзбекистонлик эркак ватанга қайтарилган.
Изоҳ (0)