Эрон президенти Масъуд Пезешкиён давлат ташрифи билан Тожикистон пойтахти Душанбега борди. Пезешкиён тожикистонлик ҳамкасби Эмомали Раҳмон билан Афғонистон масаласини муҳокама қилганини маълум қилди.
У Раҳмон билан ўтказилган қўшма матбуот анжуманида шундай деди:
“Афғонистон минтақамиздаги муҳим давлат бўлиб, унинг ривожланиши ва барқарорлиги бизнинг манфаатларимизга мос келади. Биз учун чегаралар хавфсизлигини таъминлаш жуда муҳим”.
Эрон президенти маъмурияти маълумотларига кўра, “икки президент кўплаб масалаларни, жумладан, Афғонистондаги вазиятни муҳокама қилишди”. Тожикистон президенти маъмуриятининг баёнотида Раҳмон ва Пезешкиён терроризм, экстремизм ва гиёҳванд моддалар ноқонуний айланишига қарши курашда ҳамкорлик қилиш муҳимлигини таъкидлаганлари айтилган.
Икки давлат 2025 йил 16 январда Эрон президентининг Душанбега илк давлат ташрифи доирасида 23 та ҳамкорлик битимини имзолаб, икки томонлама муносабатларни мустаҳкамлашда муҳим қадам қўйдилар. Давлат раҳбарлари иштирокида имзоланган ушбу келишувлар кенг қамровли соҳаларни ўз ичига олиб, икки форс тилли мамлакат ўртасидаги муносабатларда янги саҳифа очди.
Эрон ва Тожикистон: асосий секторларда ҳамкорликни кенгайтирмоқда
Имзоланган битимлар транспорт, технологиялар, таълим, соғлиқни сақлаш, савдо ва маданият соҳаларини қамраб олади. Бу эса кўп йиллик мураккаб муносабатлар даврининг якунланиши ва ҳамкорликнинг янги босқичи бошланишидан дарак беради.
2015 йилда икки мамлакат ўртасидаги муносабатлар ёмонлаша бошлади. Тожикистон Эронни тақиқланган Тожикистон Ислом уйғониш партиясини (ТИУП) қўллаб-қувватлашда айблади, бу эса дипломатик алоқаларнинг кескинлашишига олиб келди. Бунга жавобан Тожикистон Эрон импортини чеклади, ўз ҳудудидаги Эрон компанияларини ёпди ва Эрон фуқаролари учун виза режимини қаттиқлаштириб қўйди.
Асосий йўналишлар қаторида қуйидагилар мавжуд:
Юк ташиш транзитини ривожлантириш. Тожикистонни глобал денгиз савдо тармоғига қўшиш мақсадида, унинг Эроннинг стратегик Чобаҳор порти орқали жаҳон бозорларига чиқишини яхшилашга алоҳида эътибор қаратилди.
Илмий ютуқлар. Тожикистон ва Эрон университетлари ўртасида ген муҳандислиги ва биотехнологиялар соҳасидаги ҳамкорлик ташаббуслар.
Рақамли технологиялар. Телекоммуникация ва рақамли технологиялар соҳасида инфратузилмани ривожлантириш ҳамда инновацияларни жорий этишга қаратилган қўшма лойиҳалар.
Соғлиқни сақлаш ва маданият. Қон қуйиш соҳасидаги ҳамкорлик, тиббиёт университетлари ўртасидаги алоқалар, шунингдек, анъанавий ҳунармандчилик ва ислом тадқиқотларини қўллаб-қувватлаш бўйича лойиҳалар.
Бундан ташқари, савдо алоқаларини яхшилаш ва шаффофликни ошириш мақсадида коррупцияга қарши курашиш, божхона ходимларини ўқитиш ва савдо палаталари ўртасида ҳамкорлик ўрнатиш бўйича битимлар имзоланди.
Эрон —Тожикистон: муносабатлардаги стратегик бурилиш
Ушбу ташриф ва имзоланган битимлар икки мамлакат ўртасидаги муносабатларда стратегик бурилиш юз берганини кўрсатмоқда. Тожикистон ташқи иқтисодий алоқаларни кенгайтиришга интилаётган бўлса, Эрон эса жаҳон бозорларига чиқиш имконини берувчи савдо ва логистика маркази сифатидаги ўз аҳамиятини тасдиқлаяпти.
2025—2027 йилларда саноатни ривожлантириш ва янги технологияларни жорий этиш бўйича режалаштирилган ташаббуслар ҳар иккала мамлакатга ҳам ўзаро иқтисодий манфаат келтириб, минтақада хавфсизликни мустаҳкамлайди.
Изоҳ (0)