Таиланд пойтахти Бангкокда 350 дан ортиқ мактаб ҳавонинг сезиларли даражада ифлосланиши туфайли ёпилди. Бу ҳақда Al Jazeera хабар берди.
Ҳафта ўртасидан бери Бангкок ҳавонинг хавфли даражада ифлосланишига қарши курашмоқда. IQAir маълумотларига кўра, ҳаво сифати индекси (IQAir) 159 га етган. Шаҳар ҳокимияти 352 та мактабнинг ёпилишига рухсат берган ва аҳолига уйдан туриб ишлашни тавсия қилган. Бангкокнинг 10 миллиондан ортиқ аҳолисидан атиги 100 мингга яқини ихтиёрий равишда онлайн ишлашга ўтган.
IQAir кўрсаткичи 100 дан юқори бўлса, саломатлик учун зарарли ҳисобланади, 200 дан юқори бўлса, жуда зарарли деб баҳоланади. Пойтахт губернатори Чадчарт Ситтипунтнинг айтишича, ифлосланишнинг ўсиши қишлоқ хўжалиги экинлари ва чиқиндиларни мавсумий ёқиш натижасидир. Ифлосланиш бир ой давом этса, шаҳарга уч миллиарддан олти миллиардгача бахтга (177 миллион доллар) тушиши мумкин.
Мактаблар ёпилган пайт Бангкок дунёнинг энг ифлосланган шаҳарлари орасида IQAir рейтингида еттинчи ўринни эгаллаган. Мазкур ўрин ўзгариб туради. Жумладан, 24 январь соат 14:00 бўйича ҳавонинг ифлосланиши бўйича 9-ўринда турибди, Тошкент эса 49-ўринни эгаллаган.
2024 йил декабрь ойида Тошкент шаҳри ҳавонинг ифлослиги бўйича дунёда пешқадамлар рўйхатида эди. Шаҳар ҳавосида ҳавосида майда PM2,5 дисперс зарраларининг концентрацияси 139 мкг/м3 ни ташкил этган. Бу ЖССТ томонидан тавсия этилган ўртача ҳаво сифати кўрсаткичидан деярли 28 баробарга кўп. Ўшанда пойтахт ҳавоси сифати “зарарли” таснифда турган.
Ҳаво ифлосланиши кўрсаткичлари орасида саломатлик учун энг катта хавф туғдирадигани айнан PM2,5 дисперс зарраларидир. Экология вазирлигига кўра, Ўзбекистонда ҳавонинг чанг билан ифлосланиши табиий (қуруқ иқлим, қумли ва қумлоқ тупроқлар) ва антропоген (транспорт, саноат, қурилиш ташламалари) омиллар билан боғлиқ. Кучсиз шамоллар, ҳарорат инверсияси, атмосфера ҳавосининг турғунлиги каби сабаблар атмосфера ҳавосининг табиий ифлосланиши учун шароит яратади.
Мамлакатнинг табиий хусусиятлари (қуруқ иқлим, қумли ва гилли тупроқ) сабабли атмосфера ҳавосида муаллақ заррачалар — чанг миқдори юқоридир.
Бугунги кунда саноат корхоналари ва автомобиллардан атмосферага йилига 2 миллион тоннадан зиёд ифлослантирувчи моддалар чиқмоқда. Айниқса, Тошкент, Олмалиқ, Нурафшон, Оҳангарон, Ангрен, Бекобод ва Қувасой шаҳарларида ҳаводаги ифлослантирувчи моддалар миқдори бошқа ҳудудларга нисбатан анча кўп.
Изоҳ (0)