“Тошкент ҳавоси меъёрдан ортиқ ифлосланган” — иқлимшунос пойтахт ҳавоси инсонлар соғлигига салбий таъсир қилаётганини айтди

Ўзбекистон пойхатида ҳавонинг ифлосланиш даражаси ёмонлашиб бормоқда. Бу ҳақда иқлимшунос Эркин Абдулаҳатов “Дарё” мухбири билан суҳбатда айтди.

Мутахассиснинг таъкидлашича, ҳаводаги ифлосланиш биринчи навбатда инсонлар саломатлигига салбий таъсир қилмоқда.

“Янги тадқиқотлар шуни кўрсатмоқдаки, ҳавонинг меъёрдан ортиқ ифлосланиши ҳатто саратон касаллигини ҳам келтириб чиқариши мумкин. Бундан ташқари, музкур муаммо сабаб инсонларда астма ва аллергик касалликлар кўпаяди. Кўчада юрсангиз ҳаво ифлосланишининг шаҳар аҳолисига таъсир қилаётганини реал сезасиз. Чунки ҳар 10 кишининг 2-3 тасида йўталиш ҳолатлари учрайди. Бу ҳавонинг ифлосланиш даражаси меъёрдан ортганидан ҳам далолат беради”, — дейди тадқиқотчи.

Суҳбат давомида Эркин Абдулаҳатов муаммони бартараф этиш бўйича бир қатор тавсиялар берди.

“Аввал ҳавони нима ифлослантиряпти, чанг қаердан кўтариляпти аниқлаш керак. Агар табиий омиллар таъсири кучли бўлса, чўл ҳудудларида яшил фитомассалар ҳосил қилиш лозим. Электромобилга секин ўтиляпти, бу жуда ҳам керак. Ҳаво ифлосланишини олдини олиш учун кўплаб илмий ишлар қилинган. Уларни амалиётга жорий этиш муҳим. Завод–фабрикалар мўриларига филтрловчи мосламаларни ўрнатиш ва уларни доимий техник кўрикдан ўтказиш зарур. Ҳавони асосий хавфли ифлослантирувчи моддалар завод–фабрикалардан чиқади”, — дея фикр билдирди иқлимшунос.

Аввалроқ “Ўзгидромет” директори Шерзодхўжа Ҳабибуллаев иқлим ўзгариши хавфидан огоҳлантириб, унинг салбий оқибатларини юмшатиш учун Ўрта Осиёда давлатлари биргаликда чоралар кўриши кераклигини айтганди.