Европарламент ва Европа Иттифоқига аъзо давлатлар ҳаво сифати стандартларини кучайтириш бўйича келишувга эришди. Бу ҳақда Reuters хабар берди.
Янги қоидалар Жаҳон соғлиқни сақлаш ташкилоти тавсияларига яқинроқ бўлиб, атмосферани ифлослантирувчи моддалар учун чегараларни белгилайди. Европа Иттифоқида ҳаво ифлосланиши, жумладан майда қаттиқ заррачалар туфайли 2021 йилда юрак хасталигига чалинган 253,000 киши вафот этган. Ҳавонинг қандли диабети бор одамлар учун зарарли бўлган азот диоксид билан ифлосланиши 52 000 кишининг ўлимига олиб келган, озоннинг қисқа муддатли таъсирида эса 22 000 киши вафот этган.
Европа Иттифоқининг дастлабки келишувига кўра, 2030 йилга келиб майда қаттиқ заррачалар ва азот диоксиди учун йиллик чегаралар мос равишда 25 мкг/м3 дан 10 мкг/м3 гача ва 40 мкг/м3 дан 20 мкг/м3 гача камаяди.
Ҳужжат аъзо давлатларга 2029 йил 31 январга қадар махсус сабаблар бўлса, стандартларни жорий этишни кечиктиришни сўраш имкониятини беради. Янги қоидалар расман Европа парламенти ва Кенгаш томонидан тасдиқланиши, кейин қабул қилиниши лозим.
АҚШ ҳукумати яқинда ҳаводаги майда заррачалар миқдори учун стандартларни кучайтирган эди. Рухсат этилган концентрация миқдори 12 мкг/м3 дан 9 мкг/м3 гача камайтирилди.
“Янгиланган стандарт 4500 тагача эрта ўлим ва 290 000 иш кунини йўқотишнинг олдини олади, бу эса 2032 йилда 46 миллиард долларгача соғлиқ учун фойда келтиради”, — деб ҳисоблайди АҚШ атроф-муҳитни муҳофаза қилиш агентлиги.
Изоҳ (0)