Деҳли расмийлари ҳавонинг кучли ифлосланиши туфайли мактабларни ёпди, қурилиш ишларини тўхтатди ва юк машиналарининг Ҳиндистон пойтахтига киришини чеклади. Бу ҳақида Associated Press хабар қилди.
Ҳозирда шаҳарга фақат кундалик эҳтиёж учун зарур бўлган маҳсулотлар ташувчи юк машиналари киритилмоқда.
Атмосферада инсон саломатлигига зарарли заррачалар кўп бўлгани сабабли ҳукумат вакиллари болалар, қариялар ва сурункали нафас йўллари касалликларига чалинган фуқароларни уйда қолишга чақирди.
Бундан ташқари, авиакомпаниялар кўриш имконияти ёмонлиги сабабли парвозлар кечикиши ҳақида огоҳлантирган.
Ҳиндистон пойтахтининг айрим ҳудудларида ҳавонинг ифлосланиш даражаси Жаҳон соғлиқни сақлаш ташкилоти томонидан рухсат этилган меъёрдан 50 баравар юқори.
Деҳли аҳолиси ижтимоий тармоқларда бош оғриғи ва қуруқ йўталдан шикоят қилмоқда, деб ёзади Associated Press.
14 ноябрь куни қуюқ тутун туфайли Нью-Деҳлидаги Индира Ганди халқаро аэропортида 200 дан ортиқ рейслар кечиктирилганди.
Шаҳар ҳавосининг ифлосланиш даражаси белгиланган меъёрдан 8 баравар ошиб кетган.
Ҳар йили ноябрь ва декабрь ойларида Нью-Деҳлида ҳаво сифати кескин ёмонлашиши кузатилади. Бу пойтахт минтақасига қўшни штатлардаги ўрим-йиғимдан кейин содир бўлади.
Фермерлар, тақиқларга қарамай, тонналаб қуруқ ўтларни ёқиб юборишади. Натижада қуюқ тутун пастликда жойлашган Нью-Деҳлини қоплайди.
Ҳиндистонлик олимларнинг фикрича, бундай ҳавони ютиш кунига 50 та сигарет чекиш билан баробар. Шифокорлар аҳолига кўчага чиқмасликни, чиқишга мажбур бўлганда, ҳимоя ниқобларидан фойдаланишни тавсия қилди.
Изоҳ (0)