“Иситиш тизимлари учун мазут ва кўмир ёқилгани Тошкент ҳавосини кескин ифлослантирди” — “Ўзгидромет” директори

Декабрь ойи ўрталарида қор ёғиб, ҳарорат пасайганда иситиш тизимлари газ қувватига қўшимча тарзда мазут ва кўмир ёқилгани пойтахт ҳавоси ифлосланишига жиддий таъсир қилган. Бу ҳақда “Ўзгидромет” директори Шерзодхўжа Ҳабибуллаев “Дарё” мухбири билан суҳбатда маълум қилди.

Шерзодхўжа Ҳабибуллаевнинг айтишича, заправкаларга газ етказиб бериш қисқариб, Аи-80 бензин истеъмоли ортгани ҳам пойтахт ҳавосига сезиларли зарар етказган.

“Ҳаво ифлосланиши икки турга бўлинади. Улар — табиий ва техноген омиллардир. Табиий омилни қурғоқчилик, ёғингарчилик камлиги деб билсак, техногенда ўз қўлимиз билан балансни ушламаслигимиз асосий ўринда туради. Яъни ишлаб чиқариш ташкилотлари шаҳарга яқин бўлгани, қурилишлар кўпайиши, автотранспорт воситалари сони ошгани ва ҳоказолар. Масалан, яқинда Тошкентда қор ёғганда иситиш тизимлари газ қувватига қўшимча тарзда мазут ёқилгани ҳавога жиддий таъсир қилган. Айрим жойларда иситиш тизимини ушлаб туриш учун кўмир ҳам ёқилган. Газ етказиб бериш заправкалар учун қисқартирилганда, Аи-80 бензинга кўпроқ куч берилгани ҳам техноген таъсирни бирданига оширди. Бизда ҳаво сифатини кўрсатувчи датчиклар “қизарди” (қизил зарарли ҳавони билдиради). Яқин 10 кунлик ичида шундай ҳолат кузатилди. Ўтган ҳафта шанба куни датчик “яшил” ҳолатига ўта бошлади. Яъни техноген таъсирлар ҳаво ифлосланишига кўпроқ таъсир қилмоқда”, — деди “Ўзгидромет” раҳбари.

Аввалроқ иқлимшунос Эркин Абдулаҳатов Тошкентда ҳавонинг ифлосланиши меъёрдан ортганини айтганди.

“Кўчада юрсангиз, ҳаво ифлосланишининг шаҳар аҳолисига таъсир қилаётганини реал сезасиз. Чунки ҳар 10 кишидан 2-3 кишида йўталиш ҳолатлари учрайди. Бу ҳавонинг ифлосланиш даражаси меъёрдан ортганидан ҳам далолат беради”, — деган тадқиқотчи.

Аввалроқ экология, атроф-муҳитни муҳофаза қилиш ва иқлим ўзгариши вазири маслаҳатчиси Расул Кушербаев ҳаво ифлосланиши шу зайлда давом этса, одамлар Тошкентдан оммавий кўчиб кетишларига тўғри келиши мумкинлиги ҳақида айтганди. 

Эслатиб ўтамиз, Тошкент шаҳрида энг кучли чанг тўзонларидан бири 2022 йилининг 17-октябрь куни  кузатилганди. Ўшанда пойтахт дунё рейтингида ҳавоси энг ифлос шаҳар сифатида биринчи ўринга чиққан.