Тошкент ҳавонинг ифлосланиш даражаси бўйича 15 мартда дунёнинг йирик шаҳарлари орасида 1-ўринга чиқди.
IQAir порталига кўра, соат 10:00 атрофида Тошкент ҳавосида майда PM2,5 дисперс зарраларининг концентрацияси 224 мкг/м3 ни ташкил этган – бу ЖССТ томонидан тавсия этилган ўртача ҳаво сифати кўрсаткичидан 44,8 баробарга кўп. Ҳозирда пойтахт ҳавоси сифати “жуда зарарли” таснифи турибди.
Рейтингда 2-ўринни Таиланднинг Чинаг Май шаҳри эгаллаган — PM2,5 дисперс зарраларининг концентрацияси 176 мкг/м3. Хитойнинг Пекин шаҳри 3-поғонада — 103 мкг/м3. Рейтингдаги ўнталикдан, шунингдек, Катманду (Непал), Ханчжоу (Хитой), Дакка (Бангладеш), Ханой (Вьетнам), Янгон (Мьянма), Калкутта (Ҳиндистон), Бағдод (Ироқ) эгаллаган.
Жаҳон соғлиқни сақлаш ташкилотига кўра, ҳаво ифлосланиши кўрсаткичлари орасида саломатлик учун энг катта хавф туғдирадигани айнан PM2,5 дисперс зарраларидир.
Эслатиб ўтамиз, 21 февраль куни соат 08:30 ҳолатига кўра, Тошкент ҳавоси дунёнинг йирик шаҳарлари орасида ифлосланиш рейтингида 1-ўринни эгаллаганди. Санепидқўмита чангли ҳавода қилиш керак бўлган қатор тавсиялар берган. Экология, атроф-муҳитни муҳофаза қилиш ва иқлим ўзгариши вазирлиги Ўзбекистоннинг географик ва иқлимий хусусиятларидан келиб чиққан ҳолда Жаҳон соғлиқни сақлаш ташкилоти кўрсатмаларига эришиш қийинлигини маълум қилганди. Вазирлик Соғлиқни сақлаш вазирлиги билан ҳамкорликда Ўзбекистонда атмосфера ҳавоси сифати мониторинги бўйича миллий платформа ва мобил иловани ишлаб чиқишга қаратилган лойиҳани амалга оширмоқда.
Изоҳ (1)
Bunday ifloslanish sabablaridan biri knostruksiya qumlarining yerga to'kilib shamolda chang bo'lib uchishi hisoblanadi.
Bu esa allergik va immuniteti past shaxslar, balki sog'lom kishilar uchun ham juda katta zararliklarni keltiradi, bunday sharoitda 100% tibbiy niqob taqish lozim