Tailand poytaxti Bangkokda 350 dan ortiq maktab havoning sezilarli darajada ifloslanishi tufayli yopildi. Bu haqda Al Jazeera xabar berdi.
Hafta o‘rtasidan beri Bangkok havoning xavfli darajada ifloslanishiga qarshi kurashmoqda. IQAir ma’lumotlariga ko‘ra, havo sifati indeksi (IQAir) 159 ga yetgan. Shahar hokimiyati 352 ta maktabning yopilishiga ruxsat bergan va aholiga uydan turib ishlashni tavsiya qilgan. Bangkokning 10 milliondan ortiq aholisidan atigi 100 mingga yaqini ixtiyoriy ravishda onlayn ishlashga o‘tgan.
IQAir ko‘rsatkichi 100 dan yuqori bo‘lsa, salomatlik uchun zararli hisoblanadi, 200 dan yuqori bo‘lsa, juda zararli deb baholanadi. Poytaxt gubernatori Chadchart Sittipuntning aytishicha, ifloslanishning o‘sishi qishloq xo‘jaligi ekinlari va chiqindilarni mavsumiy yoqish natijasidir. Ifloslanish bir oy davom etsa, shaharga uch milliarddan olti milliardgacha baxtga (177 million dollar) tushishi mumkin.
Maktablar yopilgan payt Bangkok dunyoning eng ifloslangan shaharlari orasida IQAir reytingida yettinchi o‘rinni egallagan. Mazkur o‘rin o‘zgarib turadi. Jumladan, 24-yanvar soat 14:00 bo‘yicha havoning ifloslanishi bo‘yicha 9-o‘rinda turibdi, Toshkent esa 49-o‘rinni egallagan.
2024-yil dekabr oyida Toshkent shahri havoning iflosligi bo‘yicha dunyoda peshqadamlar ro‘yxatida edi. Shahar havosida havosida mayda PM2,5 dispers zarralarining konsentratsiyasi 139 mkg/m3 ni tashkil etgan. Bu JSST tomonidan tavsiya etilgan o‘rtacha havo sifati ko‘rsatkichidan deyarli 28 barobarga ko‘p. O‘shanda poytaxt havosi sifati “zararli” tasnifda turgan.
Havo ifloslanishi ko‘rsatkichlari orasida salomatlik uchun eng katta xavf tug‘diradigani aynan PM2,5 dispers zarralaridir. Ekologiya vazirligiga ko‘ra, O‘zbekistonda havoning chang bilan ifloslanishi tabiiy (quruq iqlim, qumli va qumloq tuproqlar) va antropogen (transport, sanoat, qurilish tashlamalari) omillar bilan bog‘liq. Kuchsiz shamollar, harorat inversiyasi, atmosfera havosining turg‘unligi kabi sabablar atmosfera havosining tabiiy ifloslanishi uchun sharoit yaratadi.
Mamlakatning tabiiy xususiyatlari (quruq iqlim, qumli va gilli tuproq) sababli atmosfera havosida muallaq zarrachalar — chang miqdori yuqoridir.
Bugungi kunda sanoat korxonalari va avtomobillardan atmosferaga yiliga 2 million tonnadan ziyod ifloslantiruvchi moddalar chiqmoqda. Ayniqsa, Toshkent, Olmaliq, Nurafshon, Ohangaron, Angren, Bekobod va Quvasoy shaharlarida havodagi ifloslantiruvchi moddalar miqdori boshqa hududlarga nisbatan ancha ko‘p.
Izoh (0)