“Ўзбек қизи” фильмидаги роли билан томошабинларга яхши таниш бўлган актриса Айсанемхон Юсупова 2 январь куни 28 ёшни қаршилади. У баъзи ҳамкасбларига ўхшаб интервьюлар беришни ва шахсий ҳаётини оммага ошкор этишни истамайди. Шу боисдан ҳам у ҳақидаги маълумотлар жуда кам.
Қорақалпоқ қизи Айсанемхон Юсупова 1997 йилнинг 2 январида Нукус шаҳрида таваллуд топган. Оиласида қўшиқчи ва созандалар бор. Аммо у ҳеч қачон актриса бўлишни орзу қилмагани, аксинча унинг бу соҳани танлашини онасини истагани ҳақида айтган.
— Онам актриса бўлишни истаган экан. Аммо ота-онаси бунга жиддий қаршилик қилишгани учун бошқа соҳани эгаллаган. Мен ҳамиша ҳуқуқшунос бўлишни орзу қилганман. Мактабда яхши ўқирдим, уни қизил дипломга олганим билан эса мақтаноламан, дейди актриса.
Онасининг сармояси билан бастакорлар Айсанемхон Юсупова учун муаллифлик қўшиқларини ёзишади. У ёшлигидан қўшиқ куйлаб, Нукусдаги давлат тадбирларида ҳам иштирок этган. 8-9 синфда ўқиётган вақтларида “Ватан”, “Она”, “Ёшлик” ҳақида қўшиқлар айтиб, уларга клиплар суратга олдирган. Шунинг учун ҳам, экран менга унга бегона бўлмаган.
— Газета ўқишни яхши кўрардим. Ўша вақтдаги энг машҳур газеталарни ҳар ҳафта сотиб олиб, ижодкорлар билан бўлган суҳбатларни қолдирмай ўқирдим. Менимча, актрисаликка бўлган меҳр ана шунда пайдо бўлган, дейди актриса.
2012 йилда мактабни тамомлагач, Нукус Давлат Юридик коллежида таҳсил олади. Лекин коллежни тамомлагач, Тошкентга келиб, Ўзбекистон давлат санъат ва маданият институтининг “Театр ва кино актёрлиги” бўлимига ўқишга топширади. Биринчи йили ҳеч қандай тайёргарликсиз келган Айсанемхон ўқишга кира олмайди.
— Имтиҳондан йиқилганим қаттиқ таъсир қилган, яна бир йил топшираман, агар яна вазият шундай бўлса, тўғри юридик факультетига ҳужжат топшираман деб ўз-ўзимга сўз бергандим. Бир йиллик тайёргарлик қўл келиб, келаси йил Ўзбекистон давлат санъат ва маданият институтига ўқишга қабул қилинганман, дейди актриса.
Айсанемхон Юсупова 2020 йилда институтни тугатиб, магистратура бўлимига ўқишга кириб, 2022 йилда тамомлайди.
— Институтга ўқишга кираётганда, “Мен албатта театрдан ишлайман” деган мақсадим бор эди. Кино актрисаси бўлишни умуман хаёлимга келтирмасдим. Ўқишнинг илк кунида устозлар “Сёмкага чиқмайсизлар, учинчи курсгача суратга олиш ишларида қатнашиш мумкин эмас”, дейишди. Юқори курс талабалари бу гапни тасдиқлашди. Аммо гуруҳ раҳбарим Жўра Маҳмудов илк кастингда иштирок этишимга сабаб бўлган. У кастинг ўтказиладиган манзилни бериб “Иштирок этинг қизим, сиз албатта ролга тасдиқланасиз”, деганди. Борсам актрисалар тасдиқланиб бўлган экан. Ҳавфсалам пир бўлиб уйга қайтдим, аммо бир ҳафтадан кейин режиссёр ролда мени кўролганини ва тасдиқланган актрисани рад этганини айтишди. Хуллас, биринчи курсдан кино ва клипларда суратга тушишни бошладим, дейди актриса.
Актриса талабалик давридаёқ, 2017 йилда суратга олинган “Мафтун бўлдим 2” фильмида бош ролни ижро этган. Шундан сўнг, 2018 йилда режиссёр Ҳилол Насимовнинг “Ҳаёт” фильмида суратга тушган. Сўнгра, “Мерос” фильмида бош қаҳрамон қиз ролини ижро қилган. Актриса уни кино оламига олиб кирган устоз сифатида режиссёр Ҳилол Насимовдан миннатдор.
“Мерос” фильми Сингапурда ўтказилган “Сингапоре International Фильм Фестивал 2022” ва Ҳиндистонда ўтказилган “Олтин тулпор” (Golden Ҳорсе Фильм Фестивал) халқаро кинофестивалида “Энг яхши хорижий фильм” номинациясида ғолиб бўлган. Шунингдек, Россияда бўлиб ўтган “Золотой витяз” кинофорумида “Қозоқ ва ўзбек халқлари ўртасидаги анъана ва муносабатларнинг умумийлиги мавзусини очиб берганлиги учун” махсус диплом билан тақдирланган.
Айсанемхонни халқаро миқёсда танитган фильм, бу 2023 йилда суратга олинган режиссёр Акбар Бектурдиевнинг “Ўзбек қизи” фильмидир. Фильм нафақат Ўзбекистонда, балки Беларусь республикасида ҳам жуда машҳур бўлган. Фильмдаги роли учун Россия федерациясида ўтказилган халқаро “Лендок” кинофестивалида “Энг яхши аёл роли учун” тақдирланади. Шунингдек, “Тожи сомон” II Халқаро кинофестивалида “Энг яхши аёл роли учун” номинациясида ҳам ғолиб чиқади Бундан ташқари ушбу фильм Ўзбекистонда “Йилнинг энг яхши фильми” номинациясида “олтин ҳумо” мукофотига сазовор бўлди.
— “Ўзбек қизи”нинг икки ойлик сёмкасидан сўнг стрессга тушиб қолганман. У ҳозирча фаолиятимдаги энг қийин суратга олинган картина ҳисобланади. Чунки суратга олиш жараёнлари нафақат жисмоний, балки руҳий жиҳатдан ҳам кучли бўлишни талаб қиларди. Ҳар кунги сёмкалардан кейин кўкарган ва шилинган ерларимга малҳам сурардим. Энг ёмони бир куни суратга олинаётган пайтда қўлимга шиши синиқлари кириб кетган, ундан қон томчиларди. Жоним оғриқ турса-да, жамоанинг меҳнатини ҳурмат қилиб, индамай турганман. Суратга олиш ишлари бошланишидан аввал спорт билан мунтазам шуғулландим, 20 килограммлик милтиқни кўтаришга эса кўп марта тайёргарлик кўрдим. Тошкентга қайтгач, бир ой ҳеч қандай сёмкаларга бормадим. Чунки қаҳрамонимнинг руҳиятидан чиқишим жуда қийин кечди, дейди Айсанемхон Юсупова.
2023 йилда “Ёшлар куни”да “Маданият ва санъат фидокори” кўкрак нишони билан тақдирланган. Президент Шавкат Мирзиёевнинг 2024 йил 27 июндаги “Ёшлар куни муносабати билан юртимизнинг фаол ва ташаббускор ёш авлод вакилларидан бир гуруҳини мукофотлаш тўғрисида”ги фармонига мувофиқ, “Келажак бунёдкори” медали билан мукофотланган. Айни вақтда Айсанемхон фильм ва сериалларда, клипларда суратга тушишда давом этмоқда.
Изоҳ (1)
Aysanam omadingzni bersin ashadiy muxlsingz