“Чархпалак” сериалидаги Бувижон роли билан томошабинларга яхши таниш бўлган актриса Наргиза Абдуллаева “Дарёга” берган интервьюсида руҳий ҳолати, фарзандларининг берган даккиси ва асл санъат вакиллари эътибордан четда қолаётгани ҳақида гапирди.
— Кўпчилик табассум қилиб юрган инсонларда ғам йўқ, деб ҳисоблашади. Аслида, табассум қилаётганлар ҳаётда анча нарсани босиб ўтган ва дардларини унинг ортига яшироладиган инсонлар бўлишади. Бахт уй, машина ёки севимли иш билан боғлиқ эмас. Кўнгил хотиржамлиги — энг катта бахт. Бошимдан яхши-ёмон кунлар кўп ўтди. Худди ҳаётда бир бўрон, тўфондан ўтгандек бўлдим. Аммо Аллоҳим берган синовига яраша куч ҳам бераркан. Эмоционал қизман, арзимаган нарса учун ҳам йиғлашим мумкин. Ҳатто ўша сериалда ўзимдек актёр ва актрисалар рол ижро этаётганини биламан, аммо уларга ачиниб йиғлайман.
Бу ҳаётда ҳеч кимга, ҳатто севган ёрингизга ҳам ишониб, ўта меҳр бериш керак эмас экан. Чунки ҳеч бир инсон бошқа инсон учун вафодор бўлишга мажбур эмас экан. Бу ҳаёт ҳақиқатини 45 ёшга кириб энди англадим.
Актриса озодаликни яхши кўриши ва бу борада фарзандларидан танбеҳ эшитгани ҳақида гапирди.
— Ҳаддан ортиқ озодаман. Аслида, бу ҳам бир касаллик экан. Нимадандир қаттиқ асабийлашсам, бор аламимни ишдан оламан. Бирор нарса жойида турмаса, болаларни ҳам уришаман. Бу ҳолат миянинг хотиржам эмаслигидан далолат беради. Бир куни қизимнинг гапи қаттиқ таъсир қилди. “Она, нега сиз фаррошга ўхшайсиз? Ресторанга борсангиз ҳам, идишларни йиғиб қўясиз, бу сизнинг вазифангиз эмас-ку”, деди. 12 ёшли қизимнинг “Озгина ўзингизни севинг”, деган гапи юрагимни ўртаб юборди. Бир неча кундан кейин эса ўғлим “Нега ҳаммага жонингизни берасиз? Ҳаммага ёрдам берасиз, аммо улар сизга керак бўлганида келишга уларнинг вақти бўлмади-ю”, деди. Бу гапларни эшитиб, нима дейишни билмай қолдим. Билмадим, бу гапларни ўғлим қаердан эшитган? Чунки бу масалада болалар билан гаплашмайман. Бир оз ўтиб болаларимнинг улғайганини ҳис қилдим.
Наргиза Абдуллаева қандай жамоалар билан ишлашни ёқтириши ва санъатдаги ноҳақликлар ҳақида гапирди.
— Албатта, сценарийни ўрганаман. Шу билан бирга, жамоа билан ҳам танишиб чиқаман. Актрисаликдан умуман хабари йўқ, лаби ботекс, улама киприклар ҳам рол ижро этаётган бўлса, ўзимни секин четга оламан. Балки партнёрни танлашимга ҳали вақтлидир, ўзимга ортиқча баҳо бераётгандирман. Аммо актриса партнёридан энергия ололмаса, ролни қандай ҳис қилади? Хафа бўлишмасин-у, ундай актрисалар қўғирчоққа ўхшайди, кимнингдир жазмани бўлгани ёки пул бериб рол ижро этаётгани учун уларга чидаб ишлашга мажбур бўлинади. Биз асосий ролда бўлсак ҳам, режиссёрлар билан “ошиқ-мошиқ” бўлган қўғирчоқлар асосий планга чиқиб қолишади.
Сериал ва киноларимизда муаммолар жуда кўп. Костюмерлар йўқ, масъулият йўқ, тайёргарлик ҳақида-ку умуман гапирмаса бўлади. Устоз санъаткорлар вақтида келишади, аммо фалончининг писмадончиси бўлган тушдан кейин чиққан актрисалар хоҳлаган вақтларида келишади. Энг алам қиладигани — профессионал ижодкорлар уларни кутиб ўтиришади. Мана шу нарсалар алам қилгани учун ҳам кейинги пайтларда кам рол ижро этяпман, дейди актриса Наргиза Абдуллаева.
Суҳбатни тўлиқ ҳолда қуйидаги ҳавола орқали томоша қилинг.
Изоҳ (0)