Исроил армияси Яман пойтахтидаги халқаро аэропортга ҳаво ҳужумларини амалга оширди, дея хабар бермоқда Al Masirah.
Авиазарбалар оқибатида 3 киши ҳалок бўлган, уларнинг икки нафари аэропорт ходимлари, ярадорлардан бири эса БМТнинг хусусий самолёти экипажи аъзоси бўлган. Ҳодиса вақтида аэропортдаги бир нечта самолётга зарар етган. Al-Mayadeen телеканалининг хабар беришича, Санаа аэропортидаги бошқарув минораси вайрон қилинган. Қатор ОАВ хабарларига кўра, Исроил ҳарбий-ҳаво кучлари Яманнинг Ходейда порт шаҳрига ҳам ҳужум қилган.
Ҳаво ҳужумлари Ямандаги ҳусий етакчиси Абдул Малик ал-Хутийнинг телевидение орқали чиқиши чоғида амалга оширилган.
Ҳар икки томон расмийлари ҳаво ҳужумлари ҳақидаги маълумотни ҳозирча тасдиқламаган.
16 киши жароҳат олди, дея хабар беради ҳусийлар назоратидаги Al Masirah телеканали.
Жаҳон соғлиқни сақлаш ташкилоти раҳбари Тедрос Адҳаном Гебреесус ҳужум вақтида пойтахт аэропортида бўлган.
“Тахминан икки соат олдин, биз Санадан парвозга чиқмоқчи бўлганимизда, аэропорт ҳаводан бомбардимон қилинди. Самолётимиз экипаж аъзоларидан бири жароҳат олди. Аэропортда камида икки киши ҳалок бўлгани хабар қилинган. Ҳаво ҳаракатини бошқариш минораси, жўнаб кетиш зали ва учиш-қўниш йўлаги шикастланган”, деб ёзди Гебреесус.
2023 йил 7-октябрда Фаластиннинг ҲАМАС ҳаракатининг Исроилга ҳужумига жавобан Тель-Авив Фаластин ҳаракатига қарши ҳарбий операция бошлади. Бу, хусусан, Яман ҳусийларининг минтақада ҳужумларини кучайтиришига олиб келди.
Аввалроқ Ямандан учирилган баллистик ракета Тель-Авив жанубидаги жамоат боғида портлагани ҳақида хабар берилган эди. Шифокорлар 16 киши, жумладан, уч ёшли қизча енгил тан жароҳати олганини маълум қилган. Ҳусийлар зарбани шарҳлар экан, энди уларда Исроилнинг йирик шаҳарларига зарба бериш учун қурол борлигини айтган.
24 декабрь куни Исроил ташқи ишлар вазири Гидеон Саар Исроилнинг Европадаги дипломатик ваколатхоналарига ҳусийларни террорчи ташкилот сифатида тан олишни талаб қилди.
Изоҳ (0)