Фаластиннинг ҲАМАС ҳаракати Исроил билан ўт очишни тўхтатиш ва гаровдагиларни озод қилиш бўйича битимнинг якуний лойиҳасига эътироз билдирмади.
Исроил томони ҲАМАСдан расмий жавоб олганини ҳозирча тасдиқламади. Шу билан бирга, Channel 12 маълумотларига кўра, иккала томон ҳам гаровдагилар ва маҳбусларни айирбошлашга тайёргарлик кўрмоқда.
ҲАМАС лойиҳани қабул қилгани ҳақидаги зиддиятли хабарлар ортидан ҳаракатнинг расмий манбаси 13 январь куни битим лойиҳаси махсус йиғилишда муҳокама қилинишини маълум қилганди. Нашр суҳбатдошининг таъкидлашича, агар матнда фаластинликларни ташвишга солаётган “асосий масалалар” кўтарилмаса, “муносабат ижобий бўлади”.
ОАВ маълумотларига кўра, 12 январь куни Доҳада бўлиб ўтган билвосита музокаралар давомида илгари силжиш кузатилган ва 13 январь эрталаб Қатар ҳар икки томонга битимнинг якуний матнини етказган. Унда Ғазо секторидаги гаровдагиларни фаластинлик маҳбуслар эвазига озод қилиш, ўт очишни тўхтатиш, шунингдек, анклавни бошқаришнинг янги тизимини муҳокама қилишни ўз ичига олган уч босқичли келишув назарда тутилган.
EFE агентлиги битим 20 январгача, яъни АҚШнинг сайланган президенти Дональд Трампнинг лавозимга киришиш маросимигача имзоланиши мумкинлигини ёзган.
Axios нашри Исроил ва Ғазодаги ўт очишни тўхтатиш бўйича воситачилар 24 соат ичида сулҳ битими лойиҳаси ва анклавда гаровга олинганларни озод қилиш бўйича ҲАМАС ҳаракатининг жавобини кутаётгани ҳақида ёзганди.
Нашр журналистининг аниқлик киритишича, “Исроил ва воситачилар, хусусан, Қатар, Миср ва АҚШ Ғазода ўт очишни тўхтатиш ва гаровга олинганларни озод қилиш тўғрисидаги битим лойиҳаси бўйича келишувга эришган ва у ҲАМАСга юборилган”.
У билан суҳбатлашган икки исроиллик амалдорнинг таъкидлашича, ҲАМАСнинг жавоби яқин бир сутка ичида берилиши кутилмоқда.
“Келишувга яқинлашганга ўхшаймиз. Сўнгги кунларда Исроилнинг қатор масалалар бўйича позицияси жуда мослашувчан эди, аммо биз ҲАМАСдан жавоб кутмоқдамиз ва шундагина аниқ биламиз”, дея журналист суҳбатдошларидан бирининг сўзларини келтирмоқда.
Изоҳ (0)