Исроил мудофаа кучлари аскарлари Ғазо сектори шимолидаги Жабалия шаҳри яқинида ҲАМАС ҳаракатининг умумий узунлиги 2 километр бўлган туннелини портлатиб юборди. Бу ҳақда армия матбуот хизмати хабар берди.
“Бир неча ўнлаб метр чуқурликда бўлган ерости йўли йўқ қилинди”, дейилади хабарда.
Армия матбуот хизматига кўра, туннел узоқ вақтдан бери ҲАМАС томонидан "бошпана сифатида" фойдаланилган.
Шунингдек, Исроил ҳарбийлари портловчи моддалар ишлаб чиқариш учун фойдаланилган иншоотни ҳам йўқ қилганини хабар берган.
Аввалроқ Исроил армияси Ғазо сектори марказидаги Нусейрат қочқинлар лагерида Ал-Қудс ал-Явм (алқудстодай-тв) телеканалининг машинасини портлатиб юборгани хабар қилинганди.
Портлаш оқибатида беш нафар оммавий ахборот воситалари ходими ҳалок бўлди.
Ғазо ҳукумати матбуот хизмати маълумотларига кўра, ҳалок бўлганларнинг барчаси телеканал ходимлари – оператор Эймен ал-Жедий, журналистлар Файсал Абу ал-Қумсан, Иброҳим ал-Шайх Али, Муҳаммад ал-Лед ва Фади Хасунлардир. Машинадан жонли эфир учун фойдаланилган.
Ҳисоботга кўра, Ғазо секторида Исроил томонидан ўлдирилган оммавий ахборот воситалари ходимлари сони 201 нафарга етди. Ғазо ҳукумати ОАВ ходимларига қилинган ҳужум, қотиллик ва суиқасдларни кескин қоралади.
Изоҳ (0)