Жанубий Кореянинг вақтинча лавозимидан четлаштирилган президенти Юн Сок Ёл прокуратурага сўроққа чақирилди. У ҳарбий ҳолат эълон қилгани сабабли исён кўтаришга уриниш ва ҳокимиятни суиистеъмол қилишда айбланмоқда.
Жанубий Кореянинг Yonhap агентлигининг маълум қилишича, бу Юн Сок Ёлга юборилган иккинчи чақирув хати бўлиб, у биринчисини эътиборсиз қолдирган. Агар импичмент эълон қилинган президент 21 декабргача келмаса, уни қамоққа олиш учун ордер бериш масаласи кўриб чиқилиши мумкин.
Прокуратурадан ташқари, Юн Сок Ёлни Жанубий Корея полицияси, юқори мартабали амалдорлар ўртасидаги коррупцияни тергов қилиш бошқармаси ва Мудофаа вазирлигининг тергов бўлимидан иборат қўшма тергов гуруҳи ҳам сўроққа чақирган. Бу чақирувга кўра, лавозимидан четлаштирилган президент 18 декабргача келиши керак.
Шунингдек, терговчилар президентнинг телефон қўнғироқлари ёзувларини олиш мақсадида унинг хавфсизлик хизматида тинтув ўтказгани маълум қилинди.
Юн Сок Ёлнинг ўзи эса аввалроқ исёнчилик айбловларини очиқчасига рад этган эди.
14 декабрь куни Жанубий Корея парламентининг 300 нафар аъзосидан 204 нафари Юн Сок Ёлни лавозимидан четлатиш учун овоз берди. Бунга президентнинг 3 декабрь куни мамлакатда кутилмаганда ҳарбий ҳолат жорий этгани сабаб бўлди. Воқеаларнинг бундай ривожланиши парламент томонидан қўллаб-қувватланмади, шундан сўнг ҳукумат президент қарорини бекор қилишга мажбур бўлди.
Мамлакатда Юн Сок Ёл ҳамда унинг бир қатор тарафдорларига қарши тергов бошланди ва 7 декабрь куни парламентда мамлакат етакчисига импичмент масаласи кўтарилди. Бироқ ўшанда овоз беришни амалга оширишнинг иложи бўлмади - парламентда 108 ўринни эгаллаган “Фуқаролик кучи” партияси аъзолари жараённи бойкот қилди.
Парламент аъзолари импичментни қўллаб-қувватлагандан сўнг, бу масалани Жанубий Корея Конституциявий суди кўриб чиқиши керак. Эндиликда президент вазифасини вақтинча мамлакат бош вазири Хан Дак Су бажаради.
Изоҳ (0)