Жанубий Корея президенти Юн Сок Ёл Бирлашган тергов гуруҳининг сўроққа чақирувини иккинчи марта рад этди.
Вақтинчалик лавозимидан четлаштирилган республика президенти қисқа муддатли ҳарбий ҳолат эълон қилгани учун айбдор деб топилган, у Юқори мансабдор шахсларнинг коррупциясини тергов қилиш бошқармаси (CИО) идорасига келмаган.
Тергов гуруҳи Юн Сок Ёлни соат 10:00 да кутган. Соат 18:00 ҳолатига кўра, терговчилар сиёсатчидан ҳеч қандай хабар олмаган ва у сўроққа чақириш ҳақидаги иккинчи сўровни эътиборсиз қолдирганини тасдиқлаган. Шунингдек, президент адвокат тайинлаш тўғрисида билдиришнома ҳам топширмаган.
Аввалроқ Жанубий Корея полицияси юқори мартабали амалдорлар орасидаги коррупцияни тергов қилиш бошқармаси ва Мудофаа вазирлиги билан биргаликда президент ва бошқа шахсларни қўзғолонга ундаш, ҳарбий ҳолат жорий этишда ҳокимиятни суиистеъмол қилишда айблаб, қўшма тергов ўтказишга киришган эди. Прокуратура бу иш юзасидан алоҳида тергов бошлаган бўлса-да, кейинчалик ваколатларни қўшма тергов гуруҳига топширган.
Тергов гуруҳи учинчи марта чақирув қоғози юбориш ёки президентни ҳибсга олиш учун ордер олиш каби эҳтимолий чораларни кўриб чиқиш тўғрисида қарор қабул қилиши кутилмоқда. Тергов, шунингдек, импичмент иши бўйича суд жараёни коррупцияга қарши органнинг кейинги ҳаракатларига “ҳал қилувчи” таъсир кўрсатмаслигини таъкидлади.
Жанубий Корея парламенти президентнинг импичментини қўллаб-қувватлаган эди, 204 нафар депутат президентни лавозимидан четлатиш учун овоз берган, 85 нафари қарши овоз берган.
Парламент импичментни маъқуллагани муносабати билан Юн Сок Ёлнинг ваколатлари вақтинчалик тўхтатилган, Конституциявий суд эса президентни лавозимидан четлаштириш масаласини кўриб чиқмоқда. Бунинг учун судга 180 кун вақт берилади, якуний ҳукм чиқарилгунга қадар бош вазир Хан Док Су давлат раҳбари вазифасини бажаради.
Изоҳ (0)