“Калмар ўйини” сериалининг учинчи мавсуми қачон чиқади ва у қандай якунланади? (тизер)

Режиссёр Хван Дон Хек томонидан суратга олинган “Калмар ўйини” сериалининг иккинчи мавсуми экранларга чиққач, лойиҳанинг финал қисми қандай бўлишига кўплаб томошабинлар қизиқа бошлади. Қуйида Netflixънинг машҳур сериали учинчи мавсумининг мазмуни ҳақида қисқача маълумот берамиз.

Учинчи мавсумда Сон Ки Хун тақдири қандай кечади?

2-мавсумда аввалги ўйиндан уч йил ўтгач содир бўлган воқеалар ёритилади. Унда ўйин ғолиби Ки Хун ютуқ пулига махсус кишиларни ёллаб, ўйин ташкилотчисини излаб топишни ва бундай шафқатсизликка чек қўйишни мақсад қилади. Сўнг унга бошловчи Хван Ин Хонинг укаси, полиция ходими Хван Чун Хо ёрдам беришга киришади. Натижада Ки Хун яна бир бор сўнгги — 456-рақамли иштирокчи сифатида ўйинга киритилади. Унинг шериклари эса ўйинлар бўлиб ўтаётган оролни қидиришга тушади. Уларга капитан Пак ёрдам беради.

7-қисмда Ки Хун иттифоқчилар жамоасини йиғади. Унга ўзини оддий ўйинчи сифатида таништирган Ин Хо ва Ки Хуннинг энг яқин дўсти Чон Бе ҳам қўшилади. Улар биргалашиб ўйин ташкилотчиларига тегишли қуролларни олиб, душманларга қаши курашади, бироқ Ин Хо асл юзини кўрсатади ва Чон Бени ҳамда Ки Хуннинг барча тарафдорларини отиб ташлайди.

“Калмар ўйини”нинг 3-мавсумида Ки Хуннинг синовлари давом этади. Сериал режиссёри Хван Дон Хекнинг айтишича, янги эпизодларда Ки Хун шерикларининг ўлимида ўзини айбдор ҳис қилади. Бундан ташқари, муваффақиятсизликка учраган иштирокчи тушкунликка тушади ва у бундай шафқатсиз тизимга қарши курашиш бефойда деб ўйланиб қолади. Аммо бу сафарги ўйинда иложи борича кўпроқ одамлар омон қолишига ёрдам беришга ҳаракат қилади. Бахтга қарши, баъзи иштирокчиларни бошқариш, уларга ўйин сир-асрорларини ўргатиш Ки Хун учун қийинроқ бўлади, чунки атрофдагилар ундан шубҳалана бошлайди. 2-мавсум финалидаги отишмадан кейин унинг кўплаб рақиблари омон қолади.

Чун Хо ўйин бўлиб ўтаётган оролни қандай топади?

Чун Хо 1-мавсумдаги воқеалардан кейин уч йил давомида ўйинлар бўлиб ўтадиган оролни излаб топишга ҳаракат қилди. Бунда полициячига уни бир вақтлар қутқарган капитан Пак ёрдам беради. Бироқ 2-мавсумнинг 7-қисмида Пакнинг хоин эканлиги тасдиқланади. Унга бошловчи томонида укасини оролдан узоқроқ сақлаш топшириғи берилган бўлади. Сўнг ёлланма аскарлардан бири капитанни тутиб олади ва уни ўлдиради. Чун Хонинг оролни излаб топишига айнан Пак халақит берган бўлиб чиқади. 3-мавсумда Чун Хо, албатта, Пакнинг уйдирмаларини фош қилади ва уни Калмар ўйини қаерда жойлашганлигини кўрсатишга мажбур қилади.

Ноэл Кен Сокни қутқара оладими?

2-мавсумдаги соқчилар орасида Шимолий Кореялик қочқин Кен Ноэл ҳам бор эди. Бу орада соқчилар ютқазган ўйинчиларнинг аъзоларини сотишда давом этаётгани маълум бўлади. Улар 011 рақамли соқчи — Кен Ноэлни ҳам жамоасига қўшишни истайди, аммо қиз буни рад этади.

Ноэл ўйинчилар орасида дўсти Пак Кен Сокни таниб қолади. У саратон касаллигига чалинган қизини даволаш учун пул топиш мақсадида ўйинга келган бўлади. Ноэл унинг қизини шахсан танийди ва ҳатто у билан дўстлашишга улгурган бўлади. Бундан ташқари, унинг ўзи ҳам Шимолий Кореяда қолган фарзандини соғинади. Кен Сок эса Ки Хун жамоасига киради. Аммо Ноэл қўриқчи сифатида уни отишга мажбур бўлади

“Калмар ўйини”нинг 3-фаслида қандай ўйинлар бўлади?

2-мавсум финалининг сўнгги саҳналарида учинчи мавсумдан қисқа кадрлар кўрсатилади. Унда “Қанчалик шовқинсиз кетсангиз, шунчалик узоққа борасиз” ўйинидан лавҳа берилади. Қиз қўғирчоққа янги бир ўғил бола шаклида қўғирчоқ ҳам қўшилади. Хван Дон Хек бу 3-мавсумдаги энг катта ва қизғин ўйин бўлишини таъкидлайди. Мазкур турнирда жами олтита ўйин ўтказилади. Улардан учтаси 2-мавсумда кўрсатилган.

“Калмар ўйини”нинг 3-фасли қачон чиқади?

Жанубий Корея машҳур сериалининг сўнгги 3-мавсуми 2025 йилда чиқиши режалаштирилган. Унинг режиссёри лойиҳа премераси тахминан ёз фаслининг охири ёки куз фаслининг бошида бўлиши кераклигини айтган.