Жанубий Кореяда терговчилар мамлакат президенти Юн Сок Ёлни ҳибсга олиш учун 3 январь куни унинг қароргоҳига келди. Бу ҳақда Yonhap хабар берди.
Жиноий қидирув хизмати ва полиция ходимлари Юн қароргоҳига маҳаллий вақт билан тахминан соат 07:20 да келган. Тахминан соат 8:00 да 50 кишидан иборат тергов гуруҳи қароргоҳ ҳудудига кирган. Аммо у ерга киришни ҳарбийлар тўсиб қўйган. Терговчилар ҳарбийларнинг икки линиясини ёриб ўтишга муваффақ бўлган. Бироқ президент қўриқчиларининг қаршилигига дуч келган.
Полиция президент қароргоҳи атрофида тартибни сақлаш учун 45 та махсус куч бўлинмаси ва 2,7 минг ходимни жойлаштирган. Қароргоҳ ёнида “президентни ҳимоя қилиш” ва “импичментни бекор қилиш”га чақирувчи 1 минг 200 нафар Юн тарафдорлари тўпланган. Уларнинг баъзилари полиция билан тўқнашувга киришган.
Кореяда илк бор амалдаги президент ҳибсга олинади
Сеулнинг Ғарбий округ суди 31 декабрь куни президент Юн Сок Ёлни ҳибсга олиш учун ордер берди. Бунга лавозимидан четлатилган президент қўзғолонга раҳбарлик қилиш ва ҳокимиятни суиистеъмол қилишда айбланиб, уч марта сўроққа келмагани сабаб бўлди. Бу Жанубий Корея тарихида амалдаги давлат раҳбарига ҳибсга олиш учун ордер берилган биринчи ҳолатдир. Yonhap хабарига кўра, тинтув учун ордер ҳам берилган.
Президент ҳарбий ҳолат жорий этишга урингани учун ҳокимиятдан четлаштирилганди
Жанубий Корея парламенти 14 декабрь куни Юн Сок Ёлни ҳокимиятдан четлатди. Бунга давлат раҳбари томонидан 3 декабрь куни сиёсий мухолифларга қарши курашиш мақсадида эълон қилинган ҳарбий ҳолат сабаб бўлди. Юннинг қарори жамоатчиликнинг норозилигига сабаб бўлди, парламент ҳарбий ҳолатни тезда бекор қилишга муваффақ бўлди.
Президент вазифасини бажарувчи дастлаб мамлакат бош вазири Хан Док Су бўлди. Бироқ, 27 декабрь куни Жанубий Корея парламенти уни ҳам ҳокимиятдан четлатишга овоз берди. Президент вазифасини бажарувчи лавозимида унинг ўрнини бош вазирнинг биринчи ўринбосари, иқтисодиёт ва молия вазири Чхве Сан Мок эгаллади. У барқарорликни тиклаш унинг сиёсатининг устувор йўналиши эканини билдирди.
Жанубий Кореяда ҳарбий ҳолат эълон қилинишига алоқадор бўлган бир неча амалдорлар, жумладан, собиқ мудофаа вазири Ким Ён Хён ва бир неча юқори мартабали ҳарбий разведка ходимлари ҳибсга олинган.
Изоҳ (0)