Жанубий Корея Миллий ассамблеяси (парламенти) ҳарбий ҳолат жорий этилиши муносабати билан президент Юн Сок Ёлга нисбатан тергов олиб бориш учун доимий махсус прокурор тайинлаш тўғрисидаги қонун лойиҳасини қабул қилди.
Ушбу ташаббусни 210 нафар депутат қўллаб-қувватлади, 63 нафари қарши чиқди, яна 14 нафари бетараф қолди. Тергов қўзғолондаги шубҳаларга тааллуқлидир.
Жанубий Корея қонунчилигига кўра, бу конституциявий ҳокимият органларининг ишини издан чиқаришга қаратилган ҳаракатлар ҳисобланади. Президент доимий махсус прокурор тўғрисидаги қонун лойиҳасига вето қўйиш ҳуқуқига эга эмас. Тергов контрразведка қўмондони Ё Ин Хёнга ҳам тааллуқли бўлиши кутилмоқда.
Мазкур йиғилишнинг ўзида парламент Юн Сок Ёл ва яна етти нафар амалдорни қамоққа олишга чақирувчи қарорни қабул қилди. Улар орасида ҳарбий ҳолат ташаббускори, собиқ мудофаа вазири Ким Ён Хён ва зарур чораларни амалга ошириш учун масъул бўлган армия штаби бошлиғи Пак Ан Су ҳам бор.
Президент ва бир нечта амалдорга нисбатан давлатга хиёнат ва ҳокимиятни суиистеъмол қилиш бўйича тергов олиб борилмоқда, уларга мамлакатни тарк этиш тақиқланган.
Кореяда ҳарбий ҳолат
Жанубий Корея президенти Юн Сок Ёл 3 декабрь куни кечқурун мамлакатда фавқулодда ҳарбий ҳолат эълон қилди. Парламент ва сиёсий партияларнинг фаолияти тақиқланди. Давлат раҳбари бу қарорни “конституциявий тартибни ҳимоя қилиш ва мамлакат ичидаги Шимолий Корея тарафдорларини йўқ қилиш” зарурати билан изоҳлади.
Ҳукумат ҳаракатларидан норози бўлиб, парламент биноси олдида намойишчилар тўпланди. Полиция парламентга киришни тўсиб қўйди ва шаҳар кўчаларида ҳарбий техника пайдо бўлди.
Бир неча соатдан сўнг 300 депутатдан 190 нафари парламентга киришга муваффақ бўлди ва ҳарбий ҳолатни бекор қилиш учун овоз берди. Мухолифат етакчиси Ли Же Мен президент қарорини “конституцияга зид” деб атади ва уни “халққа қарши” қадам сифатида қоралади. Кечроқ Жанубий Корея президенти мамлакатда жорий этилган ҳарбий ҳолатни бекор қилишга рози бўлди.
Жанубий Корея мухолифати президент, мудофаа вазири Ким Ён Хён, ички ишлар ва хавфсизлик вазири Ли Сан Мин, шунингдек, ҳарбийлар ва полициячилардан бўлган воқеаларнинг бошқа асосий иштирокчиларини давлат тўнтаришида айблашини маълум қилди.
Корея Республикаси Миллий ассамблеяси 7 декабрь куни президент Юн Сок Ёл импичменти учун зарур миқдордаги овозларни тўплай олмади, президентни лавозимидан озод этиш учун зарур 200 кишидан 195 нафар депутат овоз берди.
11 декабрь куни парламентнинг навбатдан ташқари сессияси очилиши режалаштирилган бўлиб, унда импичмент лойиҳаси яна тақдим этилади, у бўйича овоз бериш 72 соат ичида ўтказилиши кутилмоқда.
Изоҳ (0)