Жанубий Кореяда 3 январь куни президент Юн Сок Ёлни ҳибсга олиш учун терговчилар ва полиция ходимлари унинг қароргоҳига келди. Бироқ президент қўриқчиларининг қаршилиги туфайли президент ҳибсга олинмади. Бу ҳақда CNN хабар берди.
Хавфсизлик мақсадида Жанубий Корея президентини ҳибсга олиш тўғрисидаги ордер ижроси тўхтатилди. Бу ҳақда юқори мартабали ходимларга нисбатан Коррупцияга қарши курашиш бошқармаси хабар берди. Давом этаётган қарама-қаршилик туфайли ҳибсга олиш ордерини амалда бажариш имконсиз деган хулосага келинган.
Воқеа жойига келган ходимларнинг хавфсизлиги юзасидан хавотир сабабли, ордер ижроси тўхтатилган. Полиция президент қароргоҳи атрофида тартибни сақлаш учун 45 та махсус куч бўлинмаси ва 2,7 минг ходимни жойлаштирганди. Қароргоҳ ёнида “президентни ҳимоя қилиш” ва “импичментни бекор қилиш”га чақирувчи 1 минг 200 нафар Юн тарафдорлари тўпланган. Уларнинг баъзилари полиция билан тўқнашувга киришганди. Терговчилар ва полиция президент қўриқчиларининг қаршилигига дуч келганди.
Кореяда илк бор амалдаги президент ҳибсга олинади
Сеулнинг Ғарбий округ суди 31 декабрь куни президент Юн Сок Ёлни ҳибсга олиш учун ордер берди. Бунга лавозимидан четлатилган президент қўзғолонга раҳбарлик қилиш ва ҳокимиятни суиистеъмол қилишда айбланиб, уч марта сўроққа келмагани сабаб бўлди. Бу Жанубий Корея тарихида амалдаги давлат раҳбарига ҳибсга олиш учун ордер берилган биринчи ҳолатдир. Yonhap хабарига кўра, тинтув учун ордер ҳам берилган.
Президент ҳарбий ҳолат жорий этишга урингани учун ҳокимиятдан четлаштирилганди
Жанубий Корея парламенти 14 декабрь куни Юн Сок Ёлни ҳокимиятдан четлатди. Бунга давлат раҳбари томонидан 3 декабрь куни сиёсий мухолифларга қарши курашиш мақсадида эълон қилинган ҳарбий ҳолат сабаб бўлди. Юннинг қарори жамоатчиликнинг норозилигига сабаб бўлди, парламент ҳарбий ҳолатни тезда бекор қилишга муваффақ бўлди.
Президент вазифасини бажарувчи дастлаб мамлакат бош вазири Хан Док Су бўлди. Бироқ 27 декабрь куни Жанубий Корея парламенти уни ҳам ҳокимиятдан четлатишга овоз берди. Президент вазифасини бажарувчи лавозимида унинг ўрнини бош вазирнинг биринчи ўринбосари, иқтисодиёт ва молия вазири Чхве Сан Мок эгаллади. У барқарорликни тиклаш унинг сиёсатининг устувор йўналиши эканини билдирди.
Жанубий Кореяда ҳарбий ҳолат эълон қилинишига алоқадор бўлган бир неча амалдорлар, жумладан, собиқ мудофаа вазири Ким Ён Хён ва бир неча юқори мартабали ҳарбий разведка ходимлари ҳибсга олинган.
Изоҳ (0)