3 январь куни Shunxing39 юк кемаси Тайваннинг шимоли-шарқидаги Сзилун портига яқин жойда алоқа кабелини узиб қўйди. Бу ҳақда Financial Times (FТ) хабар берди.
Кема Камерун байроғи остида сузса-да, Тайван ҳукумати унинг Jie Yang Trading Limited компаниясига тегишли эканини маълум қилди. Гонконгда рўйхатдан ўтган ушбу фирманинг директори Хитой фуқароси ҳисобланади.
Тайваннинг Chungwа Telecom алоқа оператори рақамли маълумотлар дарҳол бошқа халқаро сув ости кабелларига йўналтирилганини таъкидлади.
Тайван Жанубий Корея ҳукуматидан ёрдам сўради
Chungwа Telecom ва Тайван ҳукумати вакилларига кўра, шикастланган инфратузилма Транс-Тинч океани экспресс тизимининг бир қисми бўлиб, кабел Тайванни АҚШ ғарбий қирғоқлари билан боғлаган.
“Биз капитанни сўроқ қила олмаганимиз сабабли, Жанубий Корея расмийларидан кеманинг кейинги портини текширишда ёрдам беришни сўрадик”, дейди Тайван қирғоқ қўриқлаш хизмати вакили.
Кема яқин кунларда Кореянинг Пусан шаҳрига етиб бориши керак. Кемани автоматик аниқлаш тизими ва сунъий йўлдош маълумотлари Shunxing39 кемаси кабел узилган жойда лангарини судраб юрганини кўрсатган.
Кемани тўхтатиш иложи бўлмади
Тайван қирғоқ қўриқлаш кемаси Shunxing3 ташқи кўригини ўтказди ва капитан билан радиоалоқа ўрнатди. Бироқ, ёмон об-ҳаво шароити туфайли жавоб бериш хизмати ходимлари кемага чиқиб, кейинги тергов учун уни ушлаб туриш ҳақида буйруқ бера олмади.
Тайваннинг юқори лавозимли миллий хавфсизлик вакили кеманинг жуда ёмон аҳволда эканини таъкидлади. “У Россиянинг ‘соя’ флотига кирувчи кемаларга ўхшайди”, дея қўшимча қилди у.
FТ газетаси ёзишича, Тайпейда Хитойнинг Тайван ташқи алоқаларини яширинча узиб қўйиши ва шундан сўнг уни босиб олишидан хавотирлар мавжуд.
Изоҳ (0)