Airbus А321 йўловчи самолёти Мисрнинг Шарм-аш-Шайх шаҳридаги аэропортга фавқулодда қўнишга мажбур бўлди.
Бу ҳақда Миср Фуқаро авиацияси вазирлиги маълум қилди.
Ҳодиса самолёт ҳавога кўтарилганидан 10 дақиқа ўтиб содир бўлган. Учувчи учиш аэропортига фавқулодда қўнишни сўраган.
“Россия самолёти тўсатдан юзага келган техник носозлик туфайли ортга қайтишни сўраганидан сўнг Шарм аш-Шайх халқаро аэропортига қўнди”, дейилади агентлик хабарида.
Самолёт Шарм-аш-Шайхдан Екатеринбургга учаётган эди. Маълумотларига кўра, бортда 236 нафар йўловчи бўлган. Уларнинг ҳеч бирига зарар етмаган.
Воқеа жойига ўт ўчириш машиналари ва тез ёрдам машиналари жўнатилди. Барча йўловчилар халқаро жўнаб кетиш залига хавфсиз эвакуация қилинди. Дастлабки маълумотларга кўра, қурбонлар йўқ.
Самолётлар билан боғлиқ сўнгги пайтлардаги бошқа ҳодисалар
25 декабрь куни Боку-Грозний маршрути бўйича учган самолёт Қозоғистоннинг Оқтов шаҳрида қулаган, оқибатда 38 нафар одам ҳалок бўлганди.
28 декабрь куни Канаданинг Галифакс аэропортида самолёт қўниш чоғида ёниб кетгани хабар қилинган. Йўловчиларнинг сўзларига кўра, самолёт шассисининг ғилдиракларидан бири ишламай қолган. Галифакс аэропорти самолёт бортидаги барча йўловчилар ва экипаж аъзолари эвакуация қилинганини хабар берди.
29 декабрь, якшанба куни маҳаллий вақт билан соат 9:07 да Jeju Air авиакомпаниясининг Boeing 737-800 йўловчи самолёти Жанубий Кореяда ҳалокатга учради. Таиланднинг Бангкок шаҳридан Жанубий Кореянинг Муан шаҳрига учаётган самолёт қўниш вақтида учиш-қўниш йўлагидан чиқиб кетган ва панжарага урилган, шундан сўнг у икки қисмга бўлинган ва ёниб кетган, 177 нафардан ортиқ одам ҳалок бўлган.
29 декабрь куни Бирлашган Араб Амирликларида Jazirah Aviation Club авиакомпаниясига тегишли енгил моторли самолёт денгизга қулаб тушди. Маълум қилинишича, авиаҳалокат оқибатида учувчи ва ҳамроҳи ҳалок бўлган.
Изоҳ (0)