Хитойда 2 ёшли бола машина ўриндиғида қисилиб вафот этди

Хитойда беш ёшли қиз машина ўриндиғини созлагач, 2 яшар укаси қисилиб бўғилишдан вафот этди. Бу ҳақда South China Morning Post хабар берди.

Фожиа 2023 йил 1 май куни юз берган, бироқ суд жараёни энди якунланган. Ўша пайтда ота машинада рафиқаси ва икки фарзанди билан кетаётган бўлган. Аёл ва қизи иккинчи қаторда, икки ёш-у 7 ойлик ўғли эса ёлғиз ҳолда учинчи қаторда ўтирган.

Бола махсус хавфсизлик ўриндиғида бўлган. Опаси ўриндиқнинг орқа қисмини пастга туширган, оқибатда боланинг боши опасининг ўриндиғига қаттиқ қисилиб қолган. Икки яшар бола ҳушини йўқотган ва бадани кўкаришни бошлаган. Шифохонага олиб борилганида эса шифокорлар мия жароҳати ва кислород етишмаслиги оқибатида унинг аллақачон вафот этганини аниқлаган.

Эр-хотин авто кампаниядан тўлов талаб қилган

Ҳодисадан сўнг ота-она автомобиль ишлаб чиқарувчини “конструкция нуқсони”да айблаб судга берган. Даъвогарларга кўра, кампания аниқ огоҳлантириш бермаган ва автомобиль ўриндиғида автоматик қайтиш (ауто-ретраcтион) функцияси бўлмаган. Оила кампаниядан кечирим сўрашни ва 280 минг доллар миқдорида товон (тиббий харажатлар, ўлим учун компенсация ва руҳий қўллаб-қувватлаш тўловлари) талаб қилган.

Бироқ авто кампания унинг товарлари барча саноат стандартларига жавоб бериши, Хитойнинг мажбурий сифат синовларидан ўтганини билдирган. Пудонг туман суди эса фожиага “ота-онанинг бепарволиги” сабаб бўлганини таъкидлаб, даъвони рад этган.

Кампания мижозлари маҳсулотдан одатий шароитда фойдалангандагина жавобгар бўлади. Болалар хавфсизлиги учун энг муҳим ҳимоя чизиғи эса ота-онанинг масъулиятли назоратидир, деган судья Си Шаожун.