Британиялик олимлар кўкрак бези саратонини аниқлаш бўйича янги технология ишлаб чиқди. Унга кўра, ичига олмос ўрнатилган нанодетекторлар касалликнинг лимфа тугунларида қанчалик кенг тарқалганини аниқроқ кузатиш имконини беради. Бундай усул саратон давосида муҳим аҳамиятга эга, чунки лимфа тугунларига ўтган ҳужайраларни вақтида аниқлаш жарроҳлик амалиётининг қанчалик муваффақиятли ўтишини белгилаб беради.
Ҳозирги кунга қадар шифокорлар бундай ҳолатни аниқлаш учун радиоактив моддалар ёки флюорессент бўёқлардан фойдаланган. Аммо бундай усуллар хавфли бўлиб, беморда аллергик реакция чақиради ҳамда клиникаларда қатъий хавфсизлик чораларини талаб қилади. Шу сабабли мутахассислар узоқ йиллардан бери саратонни аниқлаш бўйича янада ишончли ва хавфсиз усулни излаб келаётган эди.
Янги технология буткул бошқача усулда ишлайди. Тадқиқотчилар ўсимтага ҳужайралар ҳаракатини кузатиш имконини берувчи магнитли махсус суюқликни юборади. У саратон ҳужайралари билан бирга лимфа тугунларига кўчади. Шифокорлар суюқлик тарқалиш йўлини кузатиш учун учида микроскопик ҳажмдаги олмос зарраси жойлаштирилган сенсорлардан фойдаланади.
Ольмосларнинг ичида NV-марказлар деб аталадиган майда бўлимлари мавжуд. Улар жуда сезгир бўлиб, ҳатто энг кучсиз магнит майдон ўзгаришини ҳам аниқлай олади. Шу туфайли олмосли сенсор суюқликнинг қаерга ҳаракатланаётганини кўрсатади ва шифокорларга айнан қайси лимфа тугунларини олиб ташлаш кераклигини аниқлашда ёрдам беради.
Уорик университетининг физика фанлари профессори Гевинг Морли бошчилигидаги илмий гуруҳ датчик учини атиги 10 миллиметргача кичрайтиришга муваффақ бўлди. Натижада бу технология бевосита жарроҳлик амалиётларида қўллаш учун етарлича ихчам ва қулай кўринишга келди.
Тадқиқот натижалари нуфузли Physical Review Applied журналида эълон қилинди. Янги усул келажакда саратон диагностикаси хавфсиз бўлишига, кўкрак бези саратонини аниқлаш ва даволаш жараёнини осонлаштиришга ёрдам бериши мумкин.
Изоҳ (0)