Airbus A321 yo‘lovchi samolyoti Misrning Sharm-ash-Shayx shahridagi aeroportga favqulodda qo‘nishga majbur bo‘ldi.
Bu haqda Misr Fuqaro aviatsiyasi vazirligi ma’lum qildi.
Hodisa samolyot havoga ko‘tarilganidan 10 daqiqa o‘tib sodir bo‘lgan. Uchuvchi uchish aeroportiga favqulodda qo‘nishni so‘ragan.
“Rossiya samolyoti to‘satdan yuzaga kelgan texnik nosozlik tufayli ortga qaytishni so‘raganidan so‘ng Sharm ash-Shayx xalqaro aeroportiga qo‘ndi”, deyiladi agentlik xabarida.
Samolyot Sharm-ash-Shayxdan Yekaterinburgga uchayotgan edi. Maʼlumotlariga ko‘ra, bortda 236 nafar yo‘lovchi bo‘lgan. Ularning hech biriga zarar yetmagan.
Voqea joyiga o‘t o‘chirish mashinalari va tez yordam mashinalari jo‘natildi. Barcha yo‘lovchilar xalqaro jo‘nab ketish zaliga xavfsiz evakuatsiya qilindi. Dastlabki ma’lumotlarga ko‘ra, qurbonlar yo‘q.
Samolyotlar bilan bog‘liq so‘nggi paytlardagi boshqa hodisalar
25-dekabr kuni Boku-Grozniy marshruti bo‘yicha uchgan samolyot Qozog‘istonning Oqtov shahrida qulagan, oqibatda 38 nafar odam halok bo‘lgandi.
28-dekabr kuni Kanadaning Galifaks aeroportida samolyot qo‘nish chog‘ida yonib ketgani xabar qilingan. Yo‘lovchilarning so‘zlariga ko‘ra, samolyot shassisining g‘ildiraklaridan biri ishlamay qolgan. Galifaks aeroporti samolyot bortidagi barcha yo'lovchilar va ekipaj a'zolari evakuatsiya qilinganini xabar berdi.
29-dekabr, yakshanba kuni mahalliy vaqt bilan soat 9:07 da Jeju Air aviakompaniyasining Boeing 737-800 yo‘lovchi samolyoti Janubiy Koreyada halokatga uchradi. Tailandning Bangkok shahridan Janubiy Koreyaning Muan shahriga uchayotgan samolyot qo‘nish vaqtida uchish-qo‘nish yo‘lagidan chiqib ketgan va panjaraga urilgan, shundan so‘ng u ikki qismga bo‘lingan va yonib ketgan, 177 nafardan ortiq odam halok bo'lgan.
29-dekabr kuni Birlashgan Arab Amirliklarida Jazirah Aviation Club aviakompaniyasiga tegishli yengil motorli samolyot dengizga qulab tushdi. Ma’lum qilinishicha, aviahalokat oqibatida uchuvchi va hamrohi halok bo‘lgan.
Izoh (0)