Туркия портларида кемалардан Исроил билан алоқадор эмаслигини ва ушбу мамлакатга ҳарбий ёки хавфли юк олиб кетмаётганини тасдиқловчи ёзма кафолат хати талаб қилинмоқда. Бу ҳақда икки мустақил юк ташиш манбаларига таяниб, Arab News хабар берди.
Манбаларнинг айтишича, порт кемаларга бундай кафолат хатини тақдим этишни оғзаки равишда сўраган, расмий ҳужжат ёки фармойиш ҳозирча мавжуд эмас. Кўрсатма Туркиянинг барча портларига тааллуқлилиги айтилмоқда. Транспорт вазирлиги ҳозирча бу борада расмий изоҳ бергани йўқ.
“Кафолат хатида кеманинг эгаси, бошқарувчиси ёки оператори Исроил билан ҳеч қандай алоқага эга эмаслиги, шунингдек бортда портловчи модда, радиоактив материал ёки ҳарбий жиҳозлар йўқлиги кўрсатилиши керак”, деган манбалардан бири.
Маълумот учун, Туркия ва Исроил ўртасидаги муносабатлар узоқ йиллик тарихга эга бўлиб, минтақавий ва сиёсий жараёнлар фонида кўплаб ўзгаришларга дуч келган. Икки давлат ўртасида 1990 йилларда дипломатик алоқалар шакллантирилиб, савдо ва ҳарбий соҳаларда ҳамкорлик ривожланган. Бироқ Туркия 2024 йил бошида Ғазодаги уруш сабаб Исроил билан йиллик қиймати 7 миллиард доллар бўлган савдо алоқаларини тўхтатиб қўйган.
Изоҳ (0)