Беларусда ҳибсга олинган Протасевич ўз айбига иқрор бўлиб, мухолифат билан алоқалари ҳақида гапириб берди

Беларусда оммавий акцияларни ташкил қилишда айбланиб, ҳибсга олинган Nexta Telegram-каналининг собиқ бош муҳаррири Роман Протасевич ўз айбига иқрор бўлганини айтди. Бу ҳақда у «ОНТ» Беларусь давлат телеканалининг «Марков. Шахсий хусуматсиз» («Марков. Ничего личного») дастурида айтиб ўтди.

«Менга ҳужжатлар тақдим этилиб, айблов эълон қилиниши билан дарҳол Жиноят кодексининг 342-моддаси — рухсат этилмаган оммавий ҳаракатларни ташкил этиш бўйича айбимни тан олдим», — деди Протасевич.

«Мен эълон қилган даъватлар, бошқа оқибатлар қатори, кўчадаги назоратсиз тартибсизликларга олиб келганини тушуниб етдим», — давом этди мухолифатчи.

Беларусь Жиноят кодексининг 342-моддаси «Жамоат тартибини қўпол равишда бузадиган ҳаракатларни ташкил этиш ва тайёрлаш ёки уларда фаол иштирок этиш» деб номланади.

Унинг биринчи қисмида: «Жамоат тартибини қўпол равишда бузадиган ва давлат хизматчиларининг қонуний талабларига очиқ бўйсунмаслик билан боғлиқ бўлган ёки транспорт воситалари, корхоналар, муассасалар ёки ташкилотларнинг фаолиятини тўхтатиш билан боғлиқ бўлган гуруҳ ҳаракатларини ташкил этиш, ёки жиддий жиноят аломатлари бўлмаган тақдирда, бундай ҳаракатларда фаол иштирок этиш жарима ёки қамоққа олиш ёки уч йилгача озодликни чеклаш ёки шу муддатга озодликдан маҳрум қилиш билан жазоланади», дейилган.

Эфирда Протасевич қуйидагиларни айтди:

• суҳбатга ихтиёрий равишда рози бўлган ва ўзини яхши ҳис қилмоқда;
• хатоларини тузатиш учун ҳамма нарсага тайёр;
• Nexta учун кўплаб маълумотларни Беларусдаги майда амалдорлар етказиб берган;
• Светлана Тихановскаяни Литва солиқ тўловчилари ва хусусий ҳомийлари қўллаб-қувватлайди;
• Польша ҳукумати Варшавадаги «Беларусь уйи»нинг хавфсизлигини таъминлаш учун 50 миллион злотий (13,5 миллион доллар) ажратган;
• Намойишлар Nexta асосчиси Степан Путило, Nexta таҳририяти аъзолари Ян Рудик ва Тадеюш Гичан, журналист Франак Вячорка, блогерлар Антон Мотолко ва Эдуард Палчис, сиёсатшунос Артём Шрайбман ва медиа менежери Дмитрий Навоша ўртасидаги махсус суҳбатда мувофиқлаштирилган;
• иқтисодий санкцияларнинг мақсади — Беларусь иқтисодиётини тезроқ қулатиш ва очлик қўзғолонларини бошлаш;
• Лукашенко кўпинча мард одам сифатида иш тутди. «Сиз уни ҳурмат қиласизми?» деган саволга, Протасевич «Албатта» деб жавоб берди.
• Протасевич ҳеч қачон кўп пул олмаган;
• барча Telegram-каналлари Светлана Тихновскаяни қўллаб-қувватлайди, ҳатто енгил танқид қилиш ҳам мумкин эмас, чунки улар грантлар ҳисобига яшайди;
• Протасевич фитначилар ва Тихановская бош қароргоҳи ўртасида алоқачи вазифасини бажарган;
• ҳарбийлар орасидан чиққан фитначилар тўнтариш уюштириш учун дастлаб 5-7 миллион евро талаб қилган, кейинчалик бу миқдор 2 миллионга туширилган;
• дастлаб Nexta канали реклама билан кун кўрган, сўнгра лойиҳа Россия томонидан молиялаштирилишни бошлаган. Россиянинг маълум бир компаниясидан катта миқдордаги пул ўтказмалари келиб тушган, компания 3-5 минг евродан тўлаган;
• Протасевич Nexta’ни молиялаштирган рус компаниясининг номини эслай олмади, лекин у Урал ва кончилик билан боғлиқлигини ҳамда йирик олигарх ва тадбиркор Михаил Гуцериевнинг рақибига тегишли эканини айтди;
• Донбассга сафари Протасевичнинг ҳаётидаги энг катта хатоси бўлган;
• Протасевич Лукашенко уни Луганск Халқ Республикасига топширмаслик учун етарлича қатъиятли бўлишига умид қилади.

Беларусь давлат телевидениеси томонидан илгари Протасевич иштирокидаги аввалги видео намойиш қилинган. Унда Протасевич унга тузоқ қуришганини даъво қилган.

Мухолифат тарафдори унинг Вильнюсга учиши ҳақида ҳеч ким билмаганини, аммо у сафдошларига қаерга учаётгани ҳақида хабар ёзиши билан самолёт Минскка қўндирилганини айтган.

«Ишончим комилки, мен шунчаки тузоққа тушдим. Чунки мен рейс ҳақида ҳеч қаерда гапирмагандим, бу ҳақда айтишим билан дарҳол ўзимни Минскда кўрдим», — деган Протасевич видеода.

Эслатиб ўтамиз, 23 май куни Беларусь ҳукумати Ryanair авиакомпаниясининг Афинадан Вильнюсга учаётган самолётини шошилинч равишда Минскка қўнишга мажбур қилганди. Самолёт йўловчилари орасида Роман Протасевич ҳам бор эди. Протасевич ва унинг севгилиси — Россия фуқароси Софя Сапега аэропортда қўлга олинган.