Google ва Netflix компаниялари ҳамкорликда “Калмар ўйини”нинг иккинчи мавсуми премераси арафасида сериалга бағишланган мини-ўйинни ишга туширди. Унда сериалдаги энг таниқли эпизодларидан бири акс этган.
Ўйинни синаб кўриш учун Google қидирув тизимига “Squid Game” (сериалнинг инглиз тилидаги номи) деб ёзинг ва экраннинг пастки қисмида пайдо бўлган жигарранг мактубни босинг. “Қизил-кўк чироқ” ўйинида спорт костюмидаги олтита иштирокчини бошқариш керак бўлади. Қўғирчоқ орқага қараб турган вақт кўк тугмани босиб, уларни олдинга силжитиш керак. Қўғирчоқ олдинга ўгирилганда ҳаракатланаётган иштирокчилар орасидан ўзига қурбон қидиради. Шу вақтда қизил тугмани босиб ўйинчиларни тўхтатиш лозим.
Мазкур мини-ўйин бутун дунё бўйлаб мобил қурилмаларда ҳам, компьютерларда ҳам мавжуд. У Netflix’да намойиш этиладиган сериалнинг иккинчи мавсумини тарғиб қилиш мақсадида йўлга қўйилган. Шунингдек, Netflix барча фойдаланувчилар учун мавжуд бўлган “Squid Game: Unleashed” номли бепул мультиплeер, “Squid Game: Virtuals” VR лойиҳасини йўлга қўйди. Бундан ташқари, компания Puma, Хbох, Duolingo ва Domino’s каби йирик брендлар билан ҳамкорлик шартномаларини имзолади.
Эслатиб ўтамиз, Жанубий Кореянинг “Калмар ўйини” сериалининг иккинчи фасли жорий йил 26 декабрда премьера қилинади. Лойиҳанинг учинчи мавсуми 2025 йилда намойиш этилади ва бу мавсум сериал учун охиргиси бўлади.
Изоҳ (0)