27 сентябрь куни Жанубий Кореянинг «Калмар ўйини» сериали (Squid Game) Netflix’даги энг машҳур шоулар ўнталиги рейтингининг юқори поғонасини эгаллади. FlixPatrol’нинг ёзишича, Корея лойиҳаси стриминг платформада бу каби натижани биринчи бор қайд этмоқда.
Netflix’нинг контент бўйича директори Тед Сарандос томоша қилишлар бўйича натижалар шундай қоладиган бўлса, «Калмар ўйини» платформанинг энг мувваффақиятли релизига айланишини билдирган. Шунингдек, сериал ижтимоий тармоқларда кенг муҳокамаларга сабаб бўляпти: #squidgame хештеги TikTok’да 22 миллиард мартадан ортиқ кўрилган. TJournal’нинг маълум қилишича, томошабинлар кадрлар билан бўлишяпти, ўзларича назариялар тузиб, айрим ўйинларни такрорлашга уринмоқда.
Диққат, материалда сериалга боғлиқ у қадар аҳамиятли бўлмаган спойлерлар мавжуд.
Сериал нима ҳақида — болалар ўйини учун «Қироллик жанги»
«Калмар ўйини»ни Жанубий Кореялик режиссёр Хван Дон-Хёк суратга олган. Унинг бошқа ишлари қаторидан болаларга нисбатан жинсий зўравонликка бағишланган «Шафқатсиз синов», «Намхансансон қалъаси» тарихий жангари фильми, шунингдек, «Мисс бувижон» комедияси ўрин олган. Мазкур картиналарнинг барчаси хитга айланган. «Калмар ўйини» сериали устидаги ишлар 2008 йилдан бошлаган бўлиб, аввалига тўлиқ метражли фильм тақдим этиш ҳақида ўйлаган.Сериал сюжетига кўра, мураккаб вазиятда қолган 456 киши ўйинда иштирок этишга таклиф қилинади. Қоидалар оддий: олти кун ва олтита болалар учун мўлжалланган ўйин. Масалан, ўша «Калмар ўйини» дея машҳурликка эришган беллашувда ўйинчилардан бири иккинчисини махсус майдондан чиқариб юбориши керак. Вазифани уддалай олмаган ўйиндан чиқади (яъни ўлади). Ғолибга 40 миллион долларга яқин мукофот пули берилади.
Бош қаҳрамонлар орасида омади чопмаган ишсиз, мижозлар пулини ўғирлаган молиячи, Шимолий Кореядан келган қочоқ, миясида ўсимта бор қария, казинода кўп пул ютқазиб қўйган безори, эзма аёл ва Покистондан келган мигрант бор. Барчанинг ўйинда қолиш учун ўз сабаблари бисёр, уларнинг ҳар бири қайси стратегия бўйича йўл тушиши кераклигини ўзи ҳал қилади.
Сериалда тажрибали томошабин учун таниш бўлган элементлар мавжуд. Биринчи навбатда у «Қироллик жанги»ни ёдга солади, амму бу ерда «Паразитлар», «Тажриба», Netflix’нинг «Платформа» ва инсон ўзидан бошқа бирор кимга ишониши мумкинми ёки йўқлигини савол остига қўядиган қатор фильмларни учратиш мумкин. Содир бўлаётган воқеалар абсурд бўлишига қарамай, «Калмар ўйини»да мотивация ва шахслар ўртасидаги можаролар ҳайратланарли даражада ҳақиқатга яқин.
«Калмар ўйини» нимаси билан томошабинга ёқади?
Сериал «бинджвотчинг»га асосланган — у томошабинда шоуни ўчириш фикри юзага келмаслиги учун доим тангликда ушлаб туради. Лойиҳада асосий эътибор қонли қотилликларга эмас (лекин қон жуда кўп), балки инсонлар қандай қарор қабул қилишига қаратилган. Муаллифлар барча ўйинчилар қандай қилиб даҳшатли тизимга кириб қолгани ва шунчаки омон қолишга уринаётганини ҳикоя қилади.Сериалнинг иккинчи ёрқин қисми — ўйиннинг ўзи. Биринчи синов «Денгиз мавжланади бир» ўйинининг муқобили. Фильм яратувчилари ютқазган иштирокчилар отиб ташланаётганида томошабин учун минимум даражада ноқулайлик яратишга уринган. Болалар учун мўлжалланган кўнгилочар ўйиндан бу каби ваҳшийликда фойдаланиш қўшимча қўрқув бағишлайди.
Бундан сериалнинг ўзига хос жиҳати келиб чиқади — унинг визуал услуби. Бир-биридан кескин фарқланувчи ўйинчиларнинг феруза рангли костюмлари ва қўриқчиларнинг пушти комбинезонлари, улкан ўйин майдончаси кўринишидаги декорация, қонга ботган ҳудуд, совға қутиси шаклидаги тобутлар — болаларча соддалик ва шафқатсизлик комбинацияси диссонанс яратади.
«Калмар ўйини» қандай қилиб интернет феноменига айланди?
Шоу 17 сентябрь куни намойиш этилиши билан Twitter’да оммавий равишда ижобий фикрлар ёғила бошлади. Ижтимоий тармоқ фойдаланувчилари бу каби картинани кутмаганини таъкидлаган бўлса, айримлар сериал билан чекланмай, корейс киносини яхши ўрганиш кераклигини таклиф берган.
Ушбу сериални кўришга 7 сабаб
1. Сериал омон қолиш борасидаги триллерларнинг классик усулидан фойдаланган, шу сабабли уни томоша қилиш жуда мароқли. Муаллифлар томошабиннинг асосий ҳис-туйғулари билан ўйнашади: қонли биринчи саҳна бўйича юзага келган шок ўтиб кетгач, ўйинни кузатиш қизиқ тус олади ва томошабин энди ким ўйиндан чиқишини башорат қилишга урина бошлайди.
2. Сюжети ва ваҳшиёна саҳналарига қарамай, сериал жонга тегмайди: барча қаҳрамонлар яхшилаб ишланган, ҳар бирининг ортида шахсий драма мавжуд. Қон — бу қаҳрамонларда қадр-қиммат ва ахлоқнинг охирги қолдиқларини ўлдирадиган инсон очкўзлигининг тимсоли. Пул том маънода ҳавода учиб юрган хаёлдан чиқмас ғояга айланади: умуман олганда иштирокчилар яшайдиган залдаги шифт остида мукофот фонди солинган улкан шиша шар осилган бўлиб, ҳар бир иштирокчининг ўлимида у тўлиб боради.
3. Сериални томоша қилиш учун яна бир сабаб — актёрларнинг қойилмақом маҳорати. Осон бўлмаган танлов қаршисида қолган қаҳрамонларга кишининг ишонгиси, уларга ҳамдард бўлгиси келади. Қочоқ ролини ўйнаган Хо Ён Чон исмли Жанубий Кореялик модель алоҳида томошабинлар меҳрига сазовор бўлган. Chanel Roberto Cavalli реклама кампаниялари учун суратга тушган модель учун бу кинодаги биринчи рол ҳисобланади.
4. «Калмар ўйини» замонавий Жанубий Кореядаги ижтимоий табақалашув ва қашшоқлик муаммосини аниқ кўрсатиб бериб, дунёнинг капиталистик тузилишини танқид қилади. Ушбу ғоя сценарийда мукаммал даражага келтирилган: қаҳрамонлар ўзи тушунган ҳолда ўлимга элтувчи ўйинни танлайди, ўлиш «истиқболи» улар учун эски ҳаётидан кўра жозибадор.
5. Жанубий Корея кинематографияси билан танишишни истаб юрганлар учун ажойиб старт. Айниқса, кўпчиликда Пон Жун-Хоинг «Паразитлар»идан кейин корея фильмларига қизиқиши ортган.
6. Сериал ҳозирда платформадан ташқарига ҳам чиқиб кетган бўлиб, интернет-феноменга айланиб улгурди. TikTok’даги #SquidGame хештеги 22 миллиард мартадан ортиқ томоша қилинган: томошабинлар ўйиндаги севимли саҳналарини жойлаштирмоқда.
7. Томоша давомида сериалнинг визуал услуби алоҳида завқ бағишлайди — чексиз лабиринтлар, идеал симметрия, қонли воқеаларга уйғунлашмайдиган тўшак саҳналари, қаҳрамонларнинг бир-биридан кескин фарқ қилувчи ёрқин костюмлари.
Мавзуга доир: Жефф Безос Netflix’ни «Калмар ўйини» учун мақтади
Изоҳ (0)