Ҳиндистонлик режиссёр Соҳам Шоҳ Netflix стриминг хизматини “Калмар ўйини” сериали туфайли плагиатда айблади. Бу ҳақда Bloomberg нашри Нью Йорк жанубий округи федерал суди маълумотлар базасидаги ҳужжатларга таяниб хабар бермоқда, деб ёзади Охu.аz.
Режиссёрнинг сўзларига кўра, “Калмар ўйини” унинг “Фортуна” (Luck) номли фильмининг “тўғридан-тўғри кўчирилган варианти”дир. Унинг даъво қилишича, “Калмар ўйини”нинг асосий сюжети, мавзуси, ундаги қаҳрамонлар ҳамда ва воқеалар кетма-кетлиги “Фортуна”га жуда ўхшайди.
“Бундай ўхшашликлар тасодиф бўлиши мумкин эмас”, — дейилади даъво аризасида. Ҳинд тилидаги “Фортуна” фильмининг премьераси 2009 йилда бўлиб ўтган.
Netflix компанияси берган маълумотларда айтилишича, режиссёр Шоҳнинг даъвоси ҳеч қандай асосга эга эмас. Стриминг сервиси жанубий кореялик режиссёр Хван Донг Хёкнинг лойиҳасини ҳимоя қилишга тайёр эканлигини билдирди.
“Калмар ўйини” драмаси 2021 йилда намойиш этилган. Унда ҳаётга таҳлика соладиган ноодатий ўйинлар ҳақида сўз боради. Унинг иштирокчилари эса молиявий қийин вазиятга тушиб қолган одамлардир. Катта пул мукофотини қўлга киритиш учун ўйин қатнашчилари хавфли синовлардан ўтади.
Сериал 2022 йилда “Эмми” мукофотини қўлга киритган биринчи хорижий тилидаги драма бўлди. Премьерадан кейинги биринчи ой ичида драмани 142 миллион Netflix обуначиси томоша қилган. Лойиҳа бир неча ой давомида платформадаги энг машҳур сериаллардан бири бўлиб келган. “Калмар ўйини”нинг иккинчи фасли 2024 йил декабрь ойида чиқиши режалаштирилган.
Изоҳ (0)