“Эмми” мукофоти асосан Америка теледастурлари ва сериалларига бағишланган бўлса-да, АҚШдан ташқарида суратга олинган таҳсинга лойиқ ишларни ҳам эътироф этади. Улар орасида баъзи корейс драмалари, жумладан, “Кальмар ўйини” фильми шу қадар машҳурликка эришдики, фильм Америка картиналари билан мукофотлар учун курашди. Қуйида нуфузли мукофотга номзод қилиб кўрсатилган корейс фильмлари билан танишамиз.
“Чеболлар оиласининг кенжа ўғли” (2022)
“Чеболлар оиласининг кенжа ўғли” картинаси актёр Сонг Жунг Ки иштирокидаги фантастик-драма фильм ҳисобланади. Бой компания эгалари бир ходимни маблағларни ўзлаштиришда гумон қилиб, уни ўлдиришга қарор қилади. Лекин ходим компания ўғлининг сиймосида қайта гавдаланади. У нафақат ҳаётда иккинчи марта имкониятга эга бўлади, балки у собиқ хўжайини томонидан содир этилган ёмонликлар учун қасос олишга ҳам қодир бўлади.
“Ғайриоддий ҳуқуқшунос У Йон У” (2022)
2023 йилда яна бир “Эмми” мукофотига номзод Парк Эун Бин иштирокидаги танқидчилар ва мухлисларнинг севимли драмаси “Ғайриоддий ҳуқуқшунос У Йон У” фильми бўлди. Фильм сюжети аутизм спектрининг бузилиши билан касалланган адвокат У Йон Унинг Кореядаги энг етакчи юридик фирмаларидан бирига ишга кириши ҳақида. Унинг ноодатий хатти-ҳаракатлари ижтимоий ҳаётда дастлаб унга халақит беради, лекин унинг иш бўйича ўзига хос нуқтаи назари адвокатлик фирмаси учун фойдали бўлиб чиқади.
“Ошиқ қирол” (2021)
2022 йилда драма бошқа номзодларни, жумладан, Бразилиянинг “Императорлик даврида”, Испаниянинг “Икки ҳаёт” ва Хитойнинг “Сен менинг қаҳрамонимсан” сериалларини ортда қолдириб, “Энг яхши мини-сериал” номинацияси бўйича “Эмми” мукофотини қўлга киритди. Унда бош ролларни Парк Эн Бин ва SF9 мусиқа гуруҳидан Роун ижро этган.
“Кальмар ўйини” (2021)
Netflix томонидан ишланган Жанубий Кореянинг машҳур драмаси “Кальмар ўйини” 2021 йилги “Эмми” мукофотида тарихий муваффақиятга эришди. Картина иккита “Эмми” мукофотига сазовор бўлди. Шу жумладан бош рол ижрочиси Ли Жон Же “Драма йўналишидаги сериалда энг яхши актёр” номинацияси бўйича тақдирланди.
“Ақлдан озган, лекин ҳаммаси жойида (2020)
“Ақлдан озган, лекин ҳаммаси жойида” драмаси 2021 йилда “Эмми” мукофотига номзод бўлган. Studio Dragon томонидан тасвирга олинган фильм 2020 йилнинг июндан августигача tvN кабель каналида намойиш этилган. Netflix ёрдамида драма халқаро миқёсда ҳам машҳурликка эришди.
“Денгиз ҳукмдори” (2008)
KBS телеканали томонидан суратга олинган “Денгиз ҳукмдори” фильми 2009 йилда мазкур мукофотга номзод бўлган. Драма Жанубий Кореядан ташқари кўплаб давлатларда намойиш этилган. Унда томошабинлар Корея асосчиси Жумонгнинг набираси Му Хьюлнинг ҳаёти ҳақида билиб олади. Фильмда у туғилиши билан келажакда ота-онаси, ака-укалари ва ўғлини ўлдириши ва Когурёни йўқ қилиши башорат қилинади
Драма ҳақиқий тарихий фактлар ва фантазияни бир-бирига боғлаб туради, шунинг учун баъзи воқеалар ғалати ёки жуда фантастик кўринишга эга.
Изоҳ (0)