“Калмар ўйини” сериалида 456-рақамли иштирокчи Сон Ки Хун образини ижро этган актёр Ли Жонг Же бош қаҳрамон сериалнинг кейинги қисмида бутунлай ўзгача характерда намоён бўлиши ҳақида сўзлаб берди.
Актёр таъкидлашича, “Калмар ўйини” сериали биринчи қисмида бош қаҳрамон доим қувноқ, ҳазилкаш ва позитив бўлган. Сон Ки Хун шафқатсиз ўйинни бошдан кечиргандан сўнг сериалнинг кейинги мавсумида қасос ва нафратга тўла бутунлай бошқача қиёфани гавдалантирган.
“Мен ўйиндаги барча иштирокчиларнинг аввалги ҳаёти билан боғлиқ муаммоларини ва руҳий жароҳатларини тинглаш ва қабул қилиш керак бўлган қаҳрамонни ижро этдим. Менга бу ролни ижро этиш жуда қизиқ ўтди, чунки у аввалгидан кўра жиддийроқ ва тажрибали инсонга айланади. Албатта, мазкур образни яратишда бир нечта қийинчиликларга дуч келдим”, дея актёрнинг сўзларидан иқтибос келтиради Variety.
Жанубий Кореянинг “Калмар ўйини” сериалининг иккинчи фасли жорий йилнинг 26 декабрида премьера қилиниши кутилмоқда. Лойиҳанинг учинчи мавсуми 2025 йилда намойиш этилади ва бу мавсум сериал учун охиргиси бўлади.
“Калмар ўйини”да катта пул мукофоти ваъда қилинган ўйинда омон қолиш учун шафқатсиз синовларда қатнашишга мажбур бўлган ва қарзга ботган бир гуруҳ одамлар ҳақида ҳикоя қилади. Сериал иштирокчилари болалар ўйини асосида тузилган бир нечта ҳалокатли ўйинларда иштирок этади. Ҳар бир мағлубият ўлимни англатади.
Изоҳ (0)