Netflix фильм ва телесериаллар стриминг хизмати “Калмар ўйини” сериалининг иккинчи мавсуми учун тизерни эълон қилди. Унинг премьераси жорий йилнинг 26 декабрида бўлиб ўтиши режалаштирилган.
Иккинчи мавсумда бош қаҳрамон Сон Ки Хун ўйинда ғалаба қозонганидан уч йил ўтгандан сўнг содир бўлган воқеалар тасвирланади. У кўплаб ҳалокатларга олиб келувчи даҳшатли ўйинга бутунлай чек қўйиш мақсадида мусобақа ташкилотчиларини излашга тушади. Унинг ҳаракатлари ниҳоят ўз самарасини берганида мудҳиш ўйинни тугатиш учун Сон Ки Хун яна Калмар ўйинида иштирок этиши шарт эканлиги маълум бўлади.
Лойиҳанинг иккинчи мавсумида “Эмми” мукофоти совриндори Ли Жонг Жедан ташқари, Ли Бен Хон, Ви Хажун, Кон Ю, Им Си Ван, Кан Ханил, Парк Сонхун, Ян Дон Гин ва бошқа актёрлар суратга тушади. Сериалнинг учинчи мавсуми учун режалар тайёр бўлиб, у якуний бўлади ва 2025 йилда намойиш этилади.
“Калмар ўйини” премьераси 2021 йилнинг сентябрь ойида намойиш этилди ва Netflix тарихидаги энг кўп томоша қилинган сериалга айланди. Лойиҳа дебютидан сўнг бир ой ўтиб, стириминг хизматида 1,65 миллиард соат томоша қилинган сериал бўлди.
Бундан ташқари, сериалдан илҳомланган Netflix компанияси 2023 йил ноябрь ойида “Калмар ўйини” реалити-шоусининг биринчи сериясини чиқарди. Унда 456 нафар иштирокчи 4,56 миллион АҚШ доллари мукофоти учун кураш олиб борди.
Изоҳ (0)