Американинг Netflix стриминг хизмати томондан тақдим этилган “Калмар ўйини” сериалининг режиссёри Хван Дон Хёк BBC’га берган интервьюсида суратга олиш ишларида дуч келган қийинчиликлари ҳақида сўзлаб берди.
Лойиҳага тайёргарлик кўриш ва суратга олиш ишларидаги стресс туфайли режиссёр саккиз ёки тўққизта тишини йўқотганини айтди. Бундан аввал, 2021 йилда Хван Дон Хёк лойиҳанинг биринчи мавсуми туфайли соғлиғида жиддий муаммолар пайдо бўлгани ҳақида маълум қилган эди, ўша вақтда у олтита тишидан айрилган эди.
Режиссёрнинг қўшимча қилишича, аввалига у суратга олиш пайтида бошдан кечирган катта стресс туфайли сериал давомини суратга олмасликка қарор қилган. Аммо моддий рағбат олиш учун мотивация унинг фикрини ўзгартирган. Чунки сериал ғояси узоқ йиллар давомида ҳеч қайси кино студияларга ёқмаган, фақатгина Netflix компанияси уни экранга чиқаришга рози бўлган.
Бироқ шартнома шартларига кўра, Netflix томонидан чиқарилган фильм яхши натижага эришган тақдирда даромадни бўлишмайди ва фақатгина ҳужжатда белгиланган миқдордаги маблағни беради. Шу сабабли “Калмар ўйини” деярли бир миллиард доллар даромад келтирганига қарамай, Хванг Дон Хёкка ундан ҳеч нарса насиб қилмаган.
“Гарчи биринчи мавсум бутун дунё бўйлаб жуда катта муваффақиятга эришган бўлса-да, ростини айтсам, мен жуда кам пул ишладим. Шу сабабли иккинчи мавсум устида ишлаш биринчисининг муваффақиятини қоплашга ёрдам беради”, дейди режиссёр.
Хван Дон Хёкнинг сўзларига кўра, ҳозирги лойиҳада у аввалгидан кўра кўпроқ стрессни бошдан кечирмоқда. Чунки иккинчи мавсумдаги барча ишлар нолдан ва янги актёрлар билан бошланган. Қолаверса, томошабинларнинг “Калмар ўйини 2” дан умиди катта.
Жорий йил 26 декабрда “Калмар ўйини” нинг иккинчи мавсуми премьераси бўлиб ўтади. Воқеалар биринчи мавсум тугаганидан уч йил ўтгач содир бўлади. Бош қаҳрамон, аввалги ўйинда ғалаба қозонган 456-рақамли иштирокчи кўплаб ҳалокатларга олиб келувчи даҳшатли ўйинга бутунлай чек қўйиш мақсадида мусобақа ташкилотчиларини излашга тушади ва ўйинга қайтади.
Изоҳ (0)