Режиссёр Хван Дон Хёк томонидан суратга олинган “Кальмар ўйини” фильми бутун дунёда машҳурликка эришди. 900 миллион доллардан ортиқ даромад келтирган лойиҳа дунёнинг 90 та давлатида энг яхши фильмлар рўйхатида етакчилик қилди. Мазкур сериалнинг давоми чиқишини интиқлик билан кутар эканмиз, биринчи мавсумда режиссёрлар томонидан берилган, аммо томошабин кўзи илғамаган сирли белгилар ва саҳна ортидаги фотосуратларга диққатингизни қаратамиз.
Сериалнинг илк дақиқаларида бош қаҳрамон телефон рақами кўрсатилган ташриф қоғозини олади. Рақам Жанубий Кореянинг телефонларидан қисқароқ бўлгани учун томошабинлар унга “010” рақамини қўшиб қўнғироқ қилаверади. Маълум бўлишича, бу рақам реал инсонга тегишли бўлиб, сериал ижодкорлари телефонни ўзгартирмагунча фойдаланувчи кунига минглаб қўнғироқларни қабул қилишга мажбур бўлган.
Фильмнинг саҳна рассоми Гҳе Ген Сон сўзларига кўра, “Кальмар ўйини” лойиҳаси мураккаб тажриба бўлган. Чунки корейс миллий болалар ўйинидан хавф ва зўравонликка тўла қўрқинчли саҳна яратиш мушкул вазифа эди.
Қўриқчилар махсус кийимининг ҳам рамзий маъноси бор. Режиссёр уларни чумолига қиёслаган, чунки табиатан чумолилар колониясида ҳеч қандай бўлиниш бўлмайди. Шу сабабли қўриқчилар ниқоби ортида ким яширинганини, ҳатто уларнинг жинсини ҳам англаб бўлмайди. Шунингдек, уларнинг боши ҳам ҳашарот боши сингари махсус дизайнга эга.
Офицер Хван ташкилот ҳужжатларида ўйинчилар рўйхатини кўздан кечирар экан, ундаги биринчи иштирокчи — О Ил Намнинг исми йўқлигини пайқаш мумкин. Бу эса қария аслида сохта ўйинчи эканлигини билдирувчи белги эди.
Яна бир қизиқ тафсилот: барча ўйинчилар газ билан ухлатиб қўйилиб, яширин тарзда машиналарга ўтказилган. О Ил Нам эса машинага мустақил ўтирган ягона иштирокчи эди.
Дастлаб “Кальмар ўйини” камроқ эпизодлардан иборат бўлиши керак эди, аммо сериал яратувчиси Хван Дон Хёк янги воқеалар қўшишга қарор қилди ва полиция ходими, акасини топиш учун ўйинга келган Хван Чун Хо ҳикоясини фильмга улади.
“Кальмар ўйини” да ҳар бир ўйиннинг кейинги босқичида атроф-муҳит қоронғилашиб борган. Фильмдаги зулмат қурбонларнинг кўпайганидан дарак беради. Шиша кўприк ўйини тасвирланган сўнгги раунд қоронғи хонада бўлиб ўтган. Ўйиннинг биринчи қисми эса очиқ ҳавода, ёруғликда ўтказилган.
Арқон тортиш ўйинида иштирокчиларнинг актёрлик маҳоратини ишга солишга ҳожат йўқ эди, чунки улар ҳақиқатда бор кучини ишлатиб, арқонни тортган.
Apple компанияси маҳсулотларини фильм ва телесериалларда фақат ижобий қаҳрамонлар томонидан фойдаланилган тақдирдагина ишлатиш ҳуқуқини беради. Бироқ фильм охирида Сонг Ки Хун ва О Ил Нам офисда учрашганида столда Apple техникасини кўриш мумкин.
Бир қарашда ўйингоҳдаги деталлар ўта катта ҳажмга эгадек кўринади. Улар асар муаллифлари томонидан хавфли вазият яратиш билан бирга иштирокчилар ўзини ёш ва ҳимоясиз боладек ҳис этиши учун махсус ишланган.
“Кальмар ўйини”нинг иккинчи эпизодида иштирокчилар ўйинни тарк этиб, ҳақиқий дунёга қайтади ва у ерда яна молиявий муаммоларга дуч келиб, яна бир бор ҳаёт учун хавфли ўйинга қайтишга қарор қилади. Ундаги ҳар бир ҳикоя қаҳрамоннинг қандай якун топиши ҳақида белги беради. Масалан, Чан Док Су уни таъқиб қилаётганлардан қочиб кўприкдан сакраб тушади. Мудҳиш ўйинга қайтганда эса у Хан Ми Не билан бирга шиша кўрикдан ҳалокатли тарзда йиқилади. Чхо Сан У ҳаётидаги қийин вақтларда ҳаммомда костюм кийган ҳолда ўтиргани акс этга. Ўйинда эса у ёмғир ёғаётган пайтда Сон Ки Хун билан бўлган жангда ютқазади.
Режиссёр Хван Дон Хёк “Кальмар ўйини”ни суратга олишда жуда кўп муаммога дуч келди. Сериал ғояси ҳеч кимга ёқмас, фильмни суратга олишга розилик билдирмас эди. Шунинг учун у Netflix билан шартнома имзолади. Ҳужжатга кўра, Netflix томонидан чиқарилган фильм яхши натижага эришган тақдирда даромадни бўлишмайди ва шартномада белгиланган маълум миқдордаги маблағни беради. Шу сабабли “Кальмар ўйини” деярли бир миллиард доллар даромад келтирганига қарамай, Хванг Дон Хёкка ундан ҳеч нарса насиб қилмаган.
Изоҳ (0)