Оҳангаронда 8,7 млрд сўмлик газдан ноқонуний фойдаланган ўғит ишлаб чиқариш цехи аниқланди
Тошкент вилоятида минерал ўғит ишлаб чиқариш цехи 8,7 миллиард сўмлик табиий газдан ноқонуний фойдалангани фош этилди. Бу ҳақда “Ўзэнергоинспекция” матбуот хизмати хабар берди.
Фото: “Ўзэнергоинспекция” матбуот хизмати
Маълум қилинишича, Оҳангарон туманида жойлашган “Н.” МЧЖга қарашли минерал ўғит ишлаб чиқариш цехида газ таъминоти корхонаси билан шартнома тузмасдан 1 дона буғ қозони ва 2 дона икки контурли иситиш қозонида ноқонуний равишда табиий газдан фойдаланилган.
Ушбу қоидабузарлик натижасида давлат манфаатларига 8 млрд 743 млн сўмлик зарар етказилган.
Мазкур ҳолат юзасидан тегишли ҳужжатлар расмийлаштирилиб, ҳуқуқни муҳофаза қилувчи органларга юборилди.
Энергия ресурсларидан ноқонуний фойдаланиш ҳолатлари ортиб бормоқда
Ўзбекистоннинг турли ҳудудларида энергия ресурсларидан ноқонуний фойдаланиш ҳолатлари аниқланмоқда. Ушбу ҳолатларнинг аксариятида миқдор млрд сўмдан ортиқ. Хусусан, Сирдарёда 683 млн сўмлик “свет”дан ноқонуний фойдаланган шахс ушланган эди.
Шунингдек, Сирдарёдаги маиший хизмат кўрсатиш шохобчасида 325 млн сўмлик “свет”дан ноқонуний фойдаланилгани аниқланганди. Шу билан бирга, Қорақалпоғистон Республикаси ва Тошкентда жами 2 млрд сўмлик “свет”дан ноқонуний фойдаланилгани ҳақида хабар берилган эди.
Бундан ташқари, Ангрендаги метан заправкада 1,1 млрд сўмлик электр энергиясидан ноқонуний фойдаланилгани аниқланган.
Изоҳ (0)