Ўзбекистонда 2024 йилнинг 7 декабридан 8 декабрь кунига ўтар кечаси ёғган биринчи қор изғирин совуқни бошлаб келиш баробарида, мавжуд метан заправкалар фаолиятига чеклов ўрнатилишига ҳам сабаб бўлди. Бу эса, ўз навбатида, минглаб ҳайдовчиларнинг соатлаб кўчада ўтиришига, ёнилғисиз қолиб кетишига сабаб бўлмоқда. “Дарё” журналисти Тошкент шаҳридаги метан заправкаларда навбат кутаётган ҳайдовчиларга микрофон тутди.
Ўзини Нодир деб таништирган ҳайдовчининг айтишича, унинг тирикчилиги айнан шу метан газ билан боғлиқ бўлгани сабабли заправкага кириш учун икки соат навбат кутган.
Тирикчилик шундан, газ бўлмаса бўлмайди. Бензин йўқ. Айнан Аи-80 бензини йўқ, дейди у.
Spark ҳайдовчисининг айтишича, унинг автомобили фақат газда юради.
Машинам бензинда юрмайди, шу сабаб газда навбатда турдим. Тирикчилигим айнан шундан, дейди Spark автомобили эгаси.
Lacetti ҳайдовчиси ҳали қиш бошланмасидан шундай муаммога дуч келиш уларни ўйлантириб қўйганини айтмоқда.
Бошланиши шундай бўляпти, охири ҳақида ҳали ўйламадик, дейди суҳбатдош.
Яна бир суҳбатдош бу ҳолат ҳар йили такрорланишини, бунга ўрганиш кераклигини таъкидламоқда.
Ўзбек халқи чидамли халқ-ку. Ўрганишимиз керак энди, дейди у.
Суҳбатдош, шунингдек, раҳбарлар бу ҳақда бош қотираётгани ва муаммонинг ечилишига умид қилаётганини айтди.
Муаммони ҳал қилиш учун Хитой ёки Россияга газни сотмаслик, аввало, аҳолини таъминлаш керак деб ўйлайман, дейди нафақадаги ҳайдовчилардан бири.
Яшнобод туманидаги метан заправкада ишловчи ишчининг айтишича, уларга ҳар куни соат 09:00 дан 15:00 га қадар фаолият юритишга рухсат берилган.
Биз 24 соат ишлашга ҳам тайёрмиз, лекин соат 15:00 га қадар ишлашимиз кераклиги белгиланган. Бироқ машинасининг ёнилғиси тугаб ўчиб қолганлар бўлса, уларни навбатсиз киритиб газ беряпмиз, дейди заправка ишчиси.
Газ заправкада турган такси ҳайдовчиларидан бирининг айтишича, унинг автомобили кредитга олинган бўлиб, кун давомида ишлай олса, белгиланган кредит тўловини амалга ошира олади. Соатлаб газ гаправкада ўтириш эса унга муаммо туғдиради.
Изоҳ (0)