Qoraqalpog‘iston Respublikasining To‘rtko‘l hamda Toshkent shahrining Olmazor tumanlarida elektr energiyasidan noqonuniy foydalanish holatlari fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, To‘rtko‘l tumanida “Z.T.” xususiy korxonasi va “Ch.Z.” oilaviy korxonasi masʼul shaxslari fuqaro A.A.ga tegishli Nukus ko‘chasida joylashgan umumiy ovqatlanish shoxobchasi binosida tijorat maqsadida umumiy foydalanishdagi tarmoqqa o‘zboshimchalik bilan ulangan.
Natijada jami 1,5 mlrd so‘mlik elektr energiyasidan noqonuniy foydalanilgan.
Shuningdek, Olmazor tumanida fuqaro J.M. “Xonchorbog‘” MFY hududidagi xonadonida ishlab chiqarish sexi tashkil etib, tijorat maqsadida 4 dona elektr pechlarini umumiy foydalanishdagi tarmoqqa to‘g‘ridan to‘g‘ri ulagan.
Oqibatda 567,6 mln so‘mlik elektr energiyasidan noqonuniy foydalanilgan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Bundan avval Angrendagi metan zapravka 1,1 mlrd so‘mlik elektr energiyasidan, Samarqanddagi metan zapravkada 6,6 mlrd so‘mlik gazdan noqonuniy foydalanilgani aniqlangan edi.
Izoh (0)