Андижон вилоятининг Бўстон, Самарқанд вилоятининг Оқдарё ҳамда Қорақалпоғистон Республикасининг Тўрткўл туманида энергия ресурсларига ноқонуний уланиш ҳолатлари фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Бўстон туманида “Э.О.” фермер хўжалиги раҳбари Д.Э. ва бошқалар хўжалик ер майдонларини суғориш учун сув насосини умумий фойдаланишдаги тармоққа ўзбошимчалик билан улаган. Натижада жами 310,6 млн сўмлик электр энергиясидан ноқонуний фойдаланилган.
Шунингдек, Оқдарё туманида “Янгиқўрғон” МФЙ ҳудудидаги “Х-Х.” хусусий корхонаси раҳбари Ж.Х. электр қурилмаларни тижорат мақсадида умумий фойдаланишдаги тармоққа ўзбошимчалик билан улаган. Сўнг 259,8 млн сўмлик электр энергиясидан ноқонуний фойдаланган.
Бундан ташқари, Тўрткўл туманида “Шаббаз” ОФЙ ҳудудидаги хонадонда яшовчи фуқаро С.Ю. ўз уйида газ ҳисоблагич ускунасидан ташқари газ тармоғига яширинча уланган. Оқибатда 129,4 млн сўмлик табиий газдан ноқонуний фойдаланилган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)