Ohangaronda 8,7 mlrd so‘mlik gazdan noqonuniy foydalangan o‘g‘it ishlab chiqarish sexi aniqlandi
Toshkent viloyatida mineral o‘g‘it ishlab chiqarish sexi 8,7 milliard so‘mlik tabiiy gazdan noqonuniy foydalangani fosh etildi. Bu haqda “O‘zenergoinspeksiya” matbuot xizmati xabar berdi.
Foto: “O‘zenergoinspeksiya” matbuot xizmati
Maʼlum qilinishicha, Ohangaron tumanida joylashgan “N.” MCHJga qarashli mineral o‘g‘it ishlab chiqarish sexida gaz taʼminoti korxonasi bilan shartnoma tuzmasdan 1 dona bug‘ qozoni va 2 dona ikki konturli isitish qozonida noqonuniy ravishda tabiiy gazdan foydalanilgan.
Ushbu qoidabuzarlik natijasida davlat manfaatlariga 8 mlrd 743 mln so‘mlik zarar yetkazilgan.
Mazkur holat yuzasidan tegishli hujjatlar rasmiylashtirilib, huquqni muhofaza qiluvchi organlarga yuborildi.
Energiya resurslaridan noqonuniy foydalanish holatlari ortib bormoqda
O‘zbekistonning turli hududlarida energiya resurslaridan noqonuniy foydalanish holatlari aniqlanmoqda. Ushbu holatlarning aksariyatida miqdor mlrd so‘mdan ortiq. Xususan, Sirdaryoda 683 mln so‘mlik “svet”dan noqonuniy foydalangan shaxs ushlangan edi.
Shuningdek, Sirdaryodagi maishiy xizmat ko‘rsatish shoxobchasida 325 mln so‘mlik “svet”dan noqonuniy foydalanilgani aniqlangandi. Shu bilan birga, Qoraqalpog‘iston Respublikasi va Toshkentda jami 2 mlrd so‘mlik “svet”dan noqonuniy foydalanilgani haqida xabar berilgan edi.
Bundan tashqari, Angrendagi metan zapravkada 1,1 mlrd so‘mlik elektr energiyasidan noqonuniy foydalanilgani aniqlangan.
Izoh (0)