Самарқандда 11 декабрь куни бюти-блогер Г.М. вафот этди. Бу ҳақда Бош прокуратура матбуот хизмати “Дарё”га хабар берди.
Маълум қилинишича, 2001 йилда Самарқанд шаҳрида туғилган фуқаро Г.М. 11 декабрдан 12 декабрга ўтар кечаси соат тахминан 23:00 ларда ўзини Рудакий кўчасидаги уй деразасидан пастга ташлаб, жонига қасд қилган.
Ҳолат юзасидан Самарқанд шаҳар бўйича ИИО ФМБ навбатчилик қисми томонидан шаҳар прокуратурасига берилган хабар асосида ҳодиса жойига тергов-тезкор гуруҳи чиққан.
Марҳуманинг ўлим сабабини аниқлаш мақсадида суд тиббий экспертизаси тайинланган.
Ҳозирда мазкур ҳолат юзасидан Самарқанд шаҳар прокуратураси томонидан терговга қадар текширув ҳаракатлари олиб борилмоқда.
Блогер Ақида Ҳанум Facebook’да ушбу ҳолат бўйича пост қолдирди.
Самарқандда бугун жаноза. 23-24 оралиғидаги ёшгина келинчак. Баҳорда тўйи бўлган, қорнида боласи бор экан. Ҳам косметолог, ҳам волонтёр, кўплаб хайрли ишларни ташкиллаштирган. Тунда 8-қаватдан ўзини ташлаган, дейишяпти.
Сўнгги вақтларда қайнонаси чиқиштирмаётгани, эри кун бермаётгани, кунда-кунора уруш-жанжал бўлаётгани ҳақида гапирган экан…
Бош прокуратура, ИИВ текшириши керак!, деб ёзиб қолдирган у.
Ақида Ҳанум, шунингдек, бюти-блогер Г.М. билан бўлган ёзишмаларни эълон қилиб, уларни Бош прокуратурага юборганини айтди.
Бош прокуратура матбуот хизмати ҳолат юзасидан қўшимча маълумот берди. Унга кўра, ҳолат юзасидан прокуратура томонидан терговга қадар текшириш ҳаркатлари олиб борилмоқда.
Марҳуманинг ўлими юзасидан суд-тиббиёт экспертизаси тайинланган.
Текшириш ҳаракатлари ҳар томонлама, тўлиқ ва холисона ўтказилиши ва натижаси бўйича қонуний қарор қабул қилиниши таъминланади. Текшириш давомида ижтимоий тармоқларда билдирилаётган важлар ҳам ўрганиб чиқилади, дейилади хабарда.
Изоҳ (0)