Наманган вилоятининг Давлатобод туманида 58-мактаб ўқитувчиси ўқувчисини аёвсиз калтаклади. Вилоят ИИБ ахборот хизмати мазкур ҳолатга эътибор қаратиб, воқеа юзасидан терговга қадар текширув ҳаракатлари бошланганини маълум қилди.
Мазкур воқеа ҳақида ёзган Халқ таълими вазирлиги ахборот хизмати раҳбари Лайло Рустамова блогерларга мурожаат қилиб, ўқитувчини ваҳшийликда айблашдан аввал асл ҳолатнинг тагига етиш кераклигини уқтирди.
Ҳурматли блогерлардан ўқитувчини қоралаб, «ваҳший» деб аташдан аввал ҳолатнинг тагига етишни мақсадга мувофиқ деб санаймиз. Болалар ўртасида юзага келаётган турли тарбиясизликка айнан бефарқлик ва лоқайдлик сабаб бўлмоқда. Шу боис ўқитувчини қоралашдан олдин яхшилаб мулоҳаза қилиб кўринг, — деди Лайло Рустамова Telegram’даги расмий каналида.
Халқ таълими вазирлиги ахборот хизмати раҳбарининг мазкур чиқиши жамоатчилик, хусусан журналистлар муҳокамасига сабаб бўлмоқда.
Журналист Барно Султонова вазирлик масъулининг бу чиқишига жавобан шундай дейди: «Сиз Американинг Филадельфияси мактабида шунақа фикрласангиз, ўқувчининг ўзи пешонангиздан отарди. Бутунлай жиноят ботқоғидаги ўша Филадельфиядаги мактабнинг директори сизни отиш керак деган ўқувчиларга ‘мен сени яхши кўраман, сенинг зўр ўқувчи бўлишингга ишонаман’, деб мактабнинг қора рўйхатидан чиқарган экан. Бу ҳақида пост қўйганман. Лайло Рустамова таълимда сиздек болани яхши кўрмаётганлар ишлаётгани ачинарли».
Мазкур изоҳга жавоб берган Лайло Рустамова «Мен ҳолатни оқлаганим йўқ. Бу ҳаракатни ваҳший деб аташга шошилманг, иккинчи томонни ҳам эшитинг дедим. Муносиб ўқитувчи таълимдаги бугунги ҳолатни кўриб мактабга келмайди. Болалар бетарбиялигида ота-она эмас ўқитувчи айбдор бўлиб қоляпти. Лекин ўқитувчига болага ортиқча гап гапиришга йўл қўйилмаяпти. Бирор гап гапириб кўрсин ўқитувчи ота-она мактабни бошига кўтаради. Хўш, нима қилиш керак? Ўқитувчи ҳам мактабда ота-она. Агар бола отасини сўкса ёки сенсираса ота-она қандай йўл тутади? Яна айтаман мен урганини ёқламаяпман, шунчаки ўқитувчининг ҳам ўз ҳақиқати бор уни ҳам эшитиш керак. Мен болани нега яхши кўрмайман?! Лекин ўқитувчи хор бўлган жамиятимизда уларнинг баттар хор бўлишини истамайман. Болаларнинг тарбияси, афсуски ташлаб қўйилган. Истаганини қиляпти улар», — деди.
Журналист Нуруллоҳ Шаъриф «Менда педагоглик дипломи бор-да, ўқитувчини оқлаганларнинг боласини бирма бир худди шундай калтакласам, менинг ҳам ёнимни олишармикин?», дейди. Бу гапга жавоб берган Лайло Рустамова «Мен ўқитувчи бекорга бундай қилмаганига 100 фоиз ишончим комил. Эртага синфда ёки мактабда билганини қилиб ўтирган ўқувчи чиқса ўқитувчи қаерга қараяпти деб чиқишни биламиз, лекин қилган ёмонлиги учун жазоланганида ваҳший деймиз. Мен ўқитувчи 100 фоиз ҳақ демадим, лекин ўқувчи шу ҳолатни атайин келтириб чиқарган бўлса ҳам ҳайрон бўлмайман», — деди. Вазирлик масъулининг гапини қўллаб-қувватлаган яна бир журналист Низомжон Исломов «Агар бу ерда ўқувчининг айби бўлса, ўқитувчини қораламайман. Биз мактабда бундан баттар калтакларни еганмиз. Зато ўқитувчидан қўрқардик, айтганини қилардик, ҳурмат қилардик. Ҳозирги ўқувчилар эса бир тийинга олмайди», — деб ёзади.
Ушбу мунозарани кузатиб турган Facebook фойдаланувчиси Муродилла Михлиев вазирлик масъулининг бу гапига жавобан «Бу опажонимизнинг боласини шундай калтаклаб кўриш керак. Кейин англайди», — деса, фотомухбир Нозим Абдулла «Ўқитувчининг иши ваҳшийлик, унинг ёнини олганларни ҳам ваҳший деб ҳисоблайман», дейди.
Бобур Йўлдошев исмли Facebook фойдаланувчиси «Нима бўлганда ҳам болани калтаклаш хато, иш калтаклаш билан ҳал қилинадиган бўлса, уни ақл билан битирадиганларга топшириш керак», — деса, «Маърифат» газетаси бош муҳаррири Ҳусан Карвонли «Ўқитувчи бир шаппат урсин, боринг икки шаппат урсин. Буни кўрдингизми ўзи? Ҳолатни юз кун ўргансангиз ҳам бир грамм ҳам оқлаб бўлмайди», — дейди.
Юлдуз Холиқова исмли Facebook фойдаланувчиси эса Лайло Рустамовага мурожаат қилиб, «Боланинг ота-онаси ўрнига ўзингизни қўйиб кўринг. Ўрнида сизнинг болангиз бўлса ҳам шундай дермидингиз? Ҳатто оилада ҳам болага зўравонлик ишлатилмасин деяпмиз. Шу ҳолатда ўқитувчини оқлашга қандай асос кўряпсиз? Нима сабаб бўлган тақдирда ҳам унинг болага бу даражада азоб беришга қандай ҳаққи бор? Ўқитувчининг гавдасини қаранг, боланинг гавдасини қаранг. Иккаласининг вазни, кучи тенгми? Мана шу калтаклашда бир уриб ўлдириб қўйса нима бўлади? Бу эркак агар оилали бўлса хотинини ҳам, боласини ҳам шундай калтаклашдан қайтмайди деб ким кафолат беради? Шуми ўқитувчи, педагог? Қандай асос бўлган тақдирда ҳам ҳеч ким бу ‘ўқитувчи’га болага жисмоний зўравонлик қилишига ҳуқуқ бермаган. ‘Сабаб бордир’, дебсиз. Сабаб бор, албатта. Бу ҳолатда бўлмаслиги мумкин эмас. Агар шу ўқитувчи педагоглик маҳоратини эгаллаганида нима сабаб бўлган тақдирда ҳам жаҳлини жиловлаб, болани судраб директор хонасига олиб бориб, ота-онасини чақиртиришга ақли етган бўларди. Ғазабини жиловлаш қўлидан келмайдиган, жаҳл отига минганида кўзига ҳеч нарса кўринмайдиган руҳий касалми-у? Педагог бўлса, боланинг кейинги тақдирига жавобгар бўлса, аввало ўзининг руҳий ҳолатига жавоб берсин. Кучини болани ушлаб туришга ишлатиб ота-онасини чақиртирсин, директорга олиб борсин. Сал қолса ўлдириб қўядиган қилиб урмасин», дейди.
Тармоқ фойдаланувчиси Музаффар Сайфиддинов ҳам Лайло Рустамованинг бу чиқишига жавобан «Сиз кабилар туфайли бўлади бундай ҳолатлар. Узи айбдор бўлса керак деб оқлаганлар ушбу чала-педагогларга куч ишлатишга рухсат бергандай бўлади. Нафақат педагог, балки ўз ота-онаси ҳам қўл кўтармаслиги керак болага. Нима қилишининг фарқи йўқ. Нима қилган тақдирда ҳам у куч ишлатишга сабаб бўла олмайди», — дейди.
Блогер Муфаса вазирлик масъулига мурожаат қилиб, «Агар бу бола ўзини жонига қасд қилса-чи? Шунда ҳам ўқитувчига адвокатлик қилиб ўтирасизми?», — деб савол берди, бироқ савол очиқ қолди.
Яна бир журналист Миролим Исажонов «Ростдан ўзидан ўзи урмайди-ку одам одамни. Матбуот котиб сифатида ҳолатнинг тагига етиш керак деяпти. Бу гапни деярли ҳамма матбуот котиб ҳар қанақа ҳолатга нисбатан ишлатади. Аммо ўқитувчи ўқувчини аямай ургани ачинарли», — дейди.
«Дарё» мазкур мавзу юзасидан бўлаётган муҳокамаларни кузатишда давом этади.
Изоҳ (0)