Ўзбекистонда аёллар ва вояга етмаганларни зўравонликдан ҳимоя қилишни таъминлашга қаратилган қонун имзоланганди. Блогер Шаҳноза Соатова ушбу қонун тўғрисида фикрларини билдирди.
Унинг таъкидлашича, қонуннинг қабул қилиниши тарихий ҳодиса ҳисобланади. Онг ўзгарса, вазият ўзгаради. Бугун жамиятда кузатилаётган зўравонлик ҳолатларининг асл илдизи ҳам аслида шунда, деб баҳолайди блогер.
“Назаримда, ушбу қонуннинг қабул қилиниши тарихий бир ҳодиса. Умуман қонун лойиҳасининг бир йил давомида босиб ўтган йўлининг ўзи алоҳида бир тарих. Мана шу тарихга озми-кўпми гувоҳ бўлган, дахлдор бўлган инсон сифатида айтаманки, бу қонуннинг жамиятга етказаётган ўзгача бир янги муждаси бор. Яъни энди зўравонликка аввалгидек тоқат қилиб бўлмайди.
Бегонанинг бегонага қилаётган зўравонлигини биз жиноят деб ҳисоблар эканмиз, оилада тўрт девор ичида яқинларининг, кучлиларнинг ожизларига қилаётган зўравонлигига негадир тоқатлимиз. Мана шу ҳолатни ўзгартириш керак. Онг ўзгарса, вазият ўзгаради. Бугун жамиятимизда кузатилаётган зўравонлик ҳолатларининг асл илдизи ҳам аслида шунда.
Биз оилада қилинаётган зўравонликка жуда ҳам тоқатлимиз. Ушбу қонун оилавий зўравонликни криминаллаштирар экан жамоатчиликка шундай бир муждани йўллаяптики, энди бундай ҳолатларга чидаб бўлмайди. Энди вазият ўзгариши керак. Зўравонлик ўз номи билан энди жиноят. Айниқса у оилада содир этилса, бунинг жазоси янаям оғирроқ бўлиши кераклигини жамиятга етказмоқда. Мен қонун лойиҳасини ишлаб чиқишда фаол иштирок этган барчани, хусусан, жамоатчилик фаолларини ушбу ғалаба билан табриклайман”, — дейди Шаҳноза Соатова.
Эслатиб ўтамиз, 11 апрель куни Президент администрацияси шўба мудири Саида Мирзиёева Ўзбекистонда аёллар ва вояга етмаганларни зўравонликдан ҳимоя қилишни таъминлашга қаратилган қонун имзоланганини эълон қилганди. Мутасадди барча давлат органлари, фуқаролик жамиятлари, фаоллар ва медиа — барча-барчани бу жараёнга қўшилиб, зўравонликка қарши курашнинг ягона механизмига айланишга чақирган.
Изоҳ (0)