Беларусь президенти Александр Лукашенко телебошловчи Владимир Соловёвга берган интервьюсида суверен давлатлар иттифоқининг тузилиши ва унга келажакда кимлар қўшилиши мумкинлиги ҳақида гапирди.
Суҳбат давомида Александр Лукашенко 1999 йилда Россия ва Беларусь иштирокида тузилган Иттифоқ давлати собиқ совет республикалари ҳисобига кенгайиши мумкинлиги ҳақида тўхталиб ўтган.
«Беларусь аллақачон шу ерда. Ўйлашимча, Қозоғистон учун яхши дарс бўлди. Келгуси 15 йилда деб оладиган бўлсак ва агар биз хатога йўл қўймасак, ишончим комилки, Украина ҳам шу ерда бўлади. Арманистон ҳам қаерга боради? Улар кимгадир керак деб ўйлайсизми? Озарбайжон ушбу доирадан чиқиб кетади, чунки биз ҳам кўп хатоларга йўл қўйдик ва Туркия Озарбайжонни жуда кучли қўллаб-қувватламоқда. Туркманистон, Ўзбекистон ва Тожикистонга келсак, менимча, аввало иқтисодий зарурат туфайли улар ҳам қўшилади», — дейди Лукашенко.
Қонунчилик палатаси спикери ўринбосари, депутат Алишер Қодиров Беларусь етакчисининг сўзларига муносабат билдириб, зўравонлик ва таҳдид устига қурилган давлатлар қанчалар мустаҳкам кўринмасин, мўрт бўлишини тарих кўп исботлаганини таъкидлаган.
«Ушбу режалар тескари тўлқин яратиши ва совет империясини тикламоқчи бўлаётганлар ҳудудида янги давлатлар пайдо бўлиши эҳтимолини кучайтиради. Бу эса, албатта, минтақада жиддий иқтисодий ва ижтимоий силкинишларга сабаб бўлиши мумкин. Яқин 15 йиллик режаларимизда ушбу эҳтимол кўзда тутилиши керак», — деб ёзади Қодиров.
«Бугун кўплаб ривожланган давлатлар Лукашенкони Беларусь халқи номидан гапира олмайдиган шахс деб ҳисоблайди. Шунинг учун, бугунги кунда бу инсоннинг Ўзбекистон ҳақидаги фантазияларини жиддий қабул қилиш шарт эмас», — дея таъкидлайди Бекмуродов.
Адлия вазирининг маслаҳатчиси, блогер Шаҳноза Соатова Лукашенконинг Ўзбекистон иттифоқ давлат таркибига барибир қўшилиши ҳақидаги фикрига нисбатан Беларусь президенти яна «ўша ҳунарини қилаётганини» билдирган.
«Битта ўзим бу ерда ўтиравераманми, бошқалар ҳам кирсин иттифоққа деяпти ёнбошлаволиб Кремлнинг пропагандачиси Соловевга. У ҳам яйраб кетяпти. Айтишича, биз барибир қўшиларканмиз, «союз» тикланаркан, бу кишимнинг тўлиқ бахти учун шу етишмай турганмиш. Қачонгача «батка» мустақиллигимизни таҳқирловчи, камситувчи, бизнинг давлатчилигимизга таҳдид бўлган бу каби сўзларини айтаверади ва биз жим ўтираверамиз?
Вазир маслаҳатчиси ушбу масала бўйича Ташқи ишлар вазирлиги муносабат билдиришини сўраб, вазирликка мурожаат қилган.
«Нимадир қиласизларми ё бўйнимизни эгиб, сукут аломати ризо деб ўтираверамизми? Ўтган гал гапирганида президент аниқ-тиниқ қилиб ташқи сиёсатимиз йўналишини кўрсатиб берди-ку, шунга таяниб нимадир қилиш, норозиликни билдириш, бундай гапларга тоқат қила олмаслигимизни айтиш қийинми?», — деган блогер.
Эслатиб ўтамиз, 10 январь куни Коллектив хавфсизлик шартномаси ташкилотига аъзо давлатлар раҳбарларининг Қозоғистондаги тартибсизликларга бағишланган онлайн йиғилиши бўлиб ўтганди. Йиғилишда сўзга чиққан Беларусь президенти Александр Лукашенко ўз нутқида Ўзбекистонни тилга олиб, «Қозоғистондаги вазиятдан, аввало, Ўзбекистон ҳушёр бўлиши керак. Акс ҳолда, биздаги маълумотларга кўра, тўполон ташкилотчиларининг нигоҳи, жумладан, Ўзбекистонга қаратилган», – деган эди.
Лукашенконинг сўзларига хорижлик мутахассислар ҳам ўз фикрларини билдириб ўтганди. Покистонлик мутахассис, Глобал ва стратегик тадқиқотлар марказининг ижрочи директори, Кҳалид Таимур Акрам «бундай фикрлар умуман нотўғри, чунки Ўзбекистон Марказий Осиёдаги энг кучли ва барқарор мамлакатлардан бири ҳисобланиши»ни айтиб ўтди. Кейинроқ Шавкат Мирзиёев Лукашенконинг Ўзбекистон ҳақидаги фикрларига муносабат билдириб, «ҳар қандай таҳдидга нисбатан муносиб жавоб қайтариш ва зарба бериш учун биз етарли куч ва салоҳиятга эгамиз», деган эди.
Изоҳ (0)