“Саҳар” гуруҳи солисти Анвар Жўраев тўй ва тадбирлардаги хизмати учун қанча ҳақ олишини яширмайди. Хонанда блогер Жаҳонгир Латиповга берган интервьюсида илк концертини “битта қўшиқ билан” ўтказишини ва боксчи Майк Тайсон билан қўшиқ куйлагани ҳақида гапирди.
— Тўй хизматлари ва туғилган кунга бориб қўшиқ айтиб беришим — 1000 доллардан 1500 долларгача. Қирқ дақиқа ёки бир соатлик дастур асосида хизмат қилишим эса 2000 доллар бўлади. Бир ойда бундай хизматлар 30-40 та ва ундан ҳам кўпроқ бўлиши мумкин.
— Ўзбекистонда санъаткорлар ҳозир асосан тўйдан яхши даромад қилиши мумкин. YouTube, Instagram ва мусиқий платформалар секин-аста ривожланиб, улардан ҳам келаси 5-6 йилларда яхши пул топиш мумкин бўлиб қолади. Мусиқий платформалардан ойига унча кўп даромад тушмайди — ўртача 500-1000 доллар бўлади. Санъаткорлар тўй ва тадбирлардан ташқари бизнес билан шуғулланиши мумкин — кимдир мода йўналишида, бошқа биров ресторан очади. Ҳозир шахсий бизнесим йўқ, лекин яқин орада мусиқа билан ҳамоҳанг бўлган қаҳвахона очмоқчиман.
Анвар Жўраев Майк Тайсон билан қўшиқ куйлаган
— Қозоғистоннинг Остона шаҳрида кинофестивал бўлганда боксчи Майк Тайсон меҳмон бўлиб келганди, мен ҳам қўшиқ айтиш учун боргандим. У билан суратга тушгим келган-у, аммо нима деб ёнига боришни билмай тургандим. Бир оздан сўнг саҳнада инглизча қўшиқ айтишни бошлаганман. У Тайсоннинг севимли қўшиғи экан, ўрнидан туриб олиб саҳнага чиқиб мен билан қўшилиб, шу ашулани куйлаган ва тасвирчиларга бизни суратга туширишни айтган. Кейин менинг столимда бирга ўтирасизлар деб, ўзи билан олиб ўтирган. Жуда самимий, қувноқ, киришувчан инсон экан, ҳурматим янада ошган.
45 ёшида илк концертини бераётган хонанда
— Ижтимоий тармоқларда биттагина “Ёмғир” қўшиғи билан концерт берадими, деб ёзаётганлар бўляпти. Уларга “Ҳа, икки соат давомида фақат шу ашуламни айтаман”, дейман (кулиб). Мен тенги авлод вакиллари қандай қўшиқларим борлигини яхши билишади. Жами 20 та қўшиқ айтаман — эскилари ҳам, янгилари ҳам бор. “Халқлар дўстлиги”да концерт бериш узоқ йиллик орзум бўлган, шу кун келишига ҳам оз қолди, шукр.
Хонанда 25—26 декабрь кунлари илк яккахон концерт дастурини тақдим этяпти. Чипталар ҳали етарли, нархи 30 мингдан 400 минг сўмгача белгиланган.
Изоҳ (0)