Жанубий Корея президенти Юн Сок Ёл 3 декабрь куни кечқурун мамлакатда фавқулодда ҳарбий ҳолат эълон қилди. У 45 йил ичида мамлакатда ҳарбий ҳолат эълон қилган биринчи давлат раҳбари бўлди. Парламент ва сиёсий партияларнинг фаолияти тақиқланди. Давлат раҳбари бу қарорни “конституциявий тартибни ҳимоя қилиш ва мамлакат ичидаги Шимолий Корея тарафдорларини йўқ қилиш” зарурати билан изоҳлади.
Ҳукумат ҳаракатларидан норози бўлиб, парламент биноси олдида намойишчилар тўпланди. Полиция парламентга киришни тўсиб қўйди ва шаҳар кўчаларида ҳарбий техникалар пайдо бўлди. Бир неча соатдан сўнг 300 депутатдан 190 нафари парламентга киришга муваффақ бўлди ва ҳарбий ҳолатни бекор қилиш учун овоз берди. Мухолифат етакчиси Ли Же Мен президент қарорини “конституцияга зид” деб атади ва уни “халққа қарши” қадам сифатида қоралади. Кечроқ Жанубий Корея президенти мамлакатда жорий этилган ҳарбий ҳолатни бекор қилишга рози бўлди.
Аммо ҳалигача мамлакатдаги сиёсий вазият барқарорлашгани йўқ. Хўш, президент нима учун халқ намойишига сабаб бўладиган қарор қабул қилди? Қисқа давом этган ҳарбий ҳолат аҳоли турмуш тарзига ўз таъсирини ўтказдими? “Дарё” мухбири бу каби саволларга жавоб олиш учун Жанубий Кореяда яшовчи ўзбекистонлик ҳамюртларимиз билан боғланди.
Хонзодабегим Турсунова: оиласи билан икки йилдан буён Жанубий Кореянинг Инчхон шаҳрида яшайди.
— Инчхон шаҳридаги вазият доимгидек, ҳарбий ҳолат жорий этилгани шаҳар ва одамлар ҳаётига ҳеч қандай таъсирини ўтказгани йўқ. 2 декабрь куни 23:00 ларда президент фавқулодда ҳолат эълон қилганди. Бундай вазиятда президентни бўшатиб бўлмайди, билишимча, унга импичмент берилиши керак бўлган ва у фавқулодда ҳолат эълон қилган. Буни сенаторлар қабул қилмаганлиги учун тонгга яқин ҳарбий ҳолат бекор қилингани ҳақида хабарлар тарқалди.
Ҳарбий ҳолат бўлса, транспорт ҳаракатлари, савдо ва хизмат кўрсатиш шохобчаларининг фаолияти чекланиши мумкин. Ижтимоий тармоқлар орқали билдимки, Сеулдаги ҳамюртларимизда бир оз қўрқув бўлган.
Аввалги мамлакат президенти билан ҳам шунга ўхшаш ҳолат бўлган экан. Аммо баъзи ОАВлардаги ваҳимали хабарлар сабаб Ўзбекистондаги қариндошларимиз хавотирланиб қўнғироқ қилишди. “Қуролли жангариларни кўрсатгани учун қўрқдик” дейишганидан кейин ўзим ҳам бир оз ҳадиксирадим. Чунки турмуш ўртоғим хизмат сафари билан Ўзбекистонга кетганди. Шукрки, Ўзбекистон элчихонаси вазият жиддийлашса, ёрдам бериши ҳақидаги хабарларни эълон қилди.
Мана бугун 4 декабрда ўғлим билан сайрга чиқдик. Ҳаммаси жойида, одамлар ишга, ўқишга боришяпти.
Миллати корейс, аммо ўзбек йигити билан оила қурган блогер Сабина Ким эса Сеулдаги ҳолат ҳақида маълумот берди.
— Шукрки, ҳаммаси жойида. Кеча кечаси одамлар митингга чиқишди. Бунга президент Юн Сек Ёлнинг ҳарбий ҳолат ҳақидаги хабари сабаб бўлди. Халқ унинг қарорини бекор қилишини талаб қилиб, митинг ўтказди. Турли намойиш ва митинглар 6 соат давом этди. Тонгга яқин ҳарбий ҳолат бекор қилингани ҳақида эълон қилинганидан кейин митингчилар уйига қайтди.
Айни пайтда мамлакатдаги, хусусан, Сеулдаги вазият доимгидек. Ҳеч қандай ўзгариш, қандайдир чекловлар йўқ.
Сўнгги янгиликларга кўра, мамлакат президенти хиёнатда айбланиши мумкин. Жанубий Кореянинг мухолифатдаги энг йирик “Тобуро” партияси президент Юн Сок Ёл ва мудофаа вазири Ким Ён Хённи давлатга хиёнатда айбламоқчи.
Бундай айблов ҳарбий ҳолат тўғрисидаги қарорни қабул қилиш ва унга боғлиқ ҳаракатларни қўллаб-қувватлаганлик ортидан берилиши мумкин. “Тобуро” партияси аллақачон Юн Сок Ёлдан истеъфога чиқишни талаб қилган, акс ҳолда импичмент процедураси бошланади.
Бундан ташқари, Жанубий Корея мудофаа вазири Ким Ёнг Ҳьюн ҳарбий ҳолат жорий этилиши муносабати билан истеъфога чиқишга тайёрлигини маълум қилди.
Мен президентга фавқулодда ҳарбий ҳолат туфайли юзага келган барча тартибсизликлар учун жавобгарликни ўз зиммамга олиб, истеъфога чиқиш истагимни билдирдим, деди Ким Ёнг Ҳьюн журналистларга.
Мудофаа вазири фуқаролардан узр сўраб, истеъфога чиқиш тўғрисида ариза берганини таъкидлади. Жанубий Кореянинг мухолифатдаги етакчи “Тобуро” демократик партияси мудофаа вазирига импичмент эълон қилган. Шундан сўнг вазир аҳолидан узр сўраб, ўзи истеъфога чиқишини билдирган.
Жанубий Корея мухолифати президентга қарши импичмент лойиҳасини ҳам парламентга тақдим этди.
Овоз бериш лойиҳа мажлисда кўриб чиқилганидан кейин 24-72 соат ичида ўтказилиши керак. Импичмент лойиҳасини киритишни олтита мухолифат партиясидан 191 нафар депутат қўллаб-қувватлади. Парламентда жами 300 нафар қонун чиқарувчи бор, 108 ўринни президентнинг “Фуқаролик кучи” партияси эгаллаб турибди. Импичмент эълон қилиш учун 200 та овоз керак.
Изоҳ (0)