“Сўзида туриш борасида унча-мунча эркакка ўрнак бўларди” — Ўзбек шоу-бизнеси вакиллари Ҳалима Ибрагимовани хотирламоқда (фото, видео)

Комик актриса Ҳалима Ибрагимованинг бевақт ўлими ижтимоий тармоқлар фойдаланувчилари ҳамда унинг ҳамкасблари қалбини ларзага келтирди. Кўплаб шоу-бизнес вакиллари Instagramъдаги саҳифаси орқали марҳум ҳамкасбларини хотирлаб, у ҳақда илиқ сўзларни ёзиб қолдирмоқда. Улардан айримларини эътиборингизга ҳавола этамиз.

“Ишониш жуда қийин. Ҳеч ким бу ёлғон дунёни қачон тарк этишини билмас экан. Ҳамиша юрагимдасиз, сизни яхши кўраман”, деб ёзди Муниса Ризаева.

“Ҳалимахон қайсар ижодкор бўлган. Ҳаттоки институтда бирга ўқиб юрган пайтимизда унинг санъатда ўрнини топишига кўзим етмасди. Лекин шу даражада меҳнат қилиб, интилиб, халқ меҳрини қозонди. Ҳозир “Ҳалима ким?” деб сўрасангиз, актриса, қизиқчи деган жавобларни оласиз. Демак, у ўз мақсадига эришди. Таъбир жоиз бўлса, сўзда туриш маъносида унча-мунча эркакка ўрнак бўладиган қиз эди. Аллоҳ раҳматига олсин”, деди маданият вазири Озодбек Назарбеков.

“Аллоҳ раҳмат қилсин, ҳали орзу-ниятлари кўп инсон эди. Яратганнинг ишларига қарши боролмаймиз”, деб ёзди хонанда Умида Мирҳамидова.

“Сиз доим ўзингизни шерга ўхшатардингиз. Кучли, ҳаракатчан ва енгилмас инсон эдингиз. Бу ҳаётда кўп синовлардан ўтдингиз ва доим курашдингиз. Энг охиргиси эса икки фарзандингиз учун эди, улар ҳали жуда ёш. Сиз уларга оналик меҳрини, ўзгача кучни ва севгини бериб кетдингиз. Тарихга эса ўз номингизни қолдирдингиз. Кимдир сиздан қўрқди, кўплар сизни севди. Сиз меҳрибон она, садоқатли рафиқа, яхши опа ва содиқ дўст эдингиз. Бизнинг оиламиз учун учун жуда азиз инсон, бир бўлагимиз эдингиз. Ҳар бир қувончли кунимда, фарзандларим туғилганида ҳам хурсанд бўлиб, ёнимда тургансиз. Қалби дарё инсон эдингиз. Қилган яхшиликларингизни Аллоҳ қабул қилсин, сўроқ-саволларингизни осон қилсин. Сиз доим қалбимиздасиз”, деб ёзади хонанда Нилуфар Усмонова.

“Албатта, ҳаммамизнинг борар жойимиз бир, аммо тўсатдан бундай хабарни эшитиб ҳайрон бўлиб қоларкан одам. Савол-жавобларини осон қилсин”, деб ёзади хонанда Ҳилола Ҳамидова.

“Мен учун жуда қадрли инсон, опам бугун омонатларини топширдилар. У ҳаётимда қандай ҳолат бўлишидан қатъи назар, доим ёнимда турган. Мени “болаларимнинг тоғаси, ёнингда мен турибман, газни бос”, деб қўллаб-қувватлардилар. Ҳозиргина она шеримни сўнгги манзилга жўнатиб шунақа таъсирландим. Жойингиз жаннатда бўлсин, ҳамиша қалбимиздасиз”, деб ёзади блогер ва актёр Жамшид Бобожонов.

“Ҳалимахон...Яна бир йўқотиш...Бизнинг оиламизда ҳамма вақт ҳурматда бўлган инсон эди. Раҳматли турмуш ўртоғим билан ҳазиллашиб “Мирза ака, сиз бошқачасиз”, дердилар. Мана бугун кўп ўйладим, санъатимизнинг сизнинг алоҳида ўрнингиз бўлган экан. Соғинамиз. Илоҳим жойингиз жаннатда бўлсин”, деб ёзади хонанда Тожибар Азизова.

“Халқимиз орасида вафот этган инсонлар ё яхши сўзлар билан хотирла, ёки индама, деган гап бор. Ҳалимахоннинг вафоти юзасидан таъзия изҳор қилишим баробарида баъзи инсонлар томонидан ёзилган фикрларни ўқиб лол қолдим. Шахсан менга у ҳеч қачон ёмон гапирмаган, қаерда кўрса, ҳурматимни ўрнига қўярди. Менимча у тегмаганга тегмасди, лекин унга тегган одамни тек қўймасди. Ўз ҳаққини олмагунча тинч қўймайдиган инсон эди.

У жуда кўп давраларда шундай ҳолда дунёга келмагани, балки ҳаёт қийинчиликлари, ота-онасидан ёш етим қолиши ва тақдир синовлари сабаб характери шу ҳолга келгани ҳақида айтган.

Банда борки хатокордир, Аллоҳ ҳар биримизни камчиликлар билан яратган, фақатгина Яратган беайб эканлигини унутмайлик.

Дўстлар, яхши сўзлар билан дуода бўлайлик, охиратлари обод бўлсин, яқинларига ҳамдардлик билдираман, деб ёзди хонанда Моҳира Асадова.

“Ёрдам керак бўлган вазиятда мардлик қилган, ёрдамини аямаган, ҳақиқатгўй, ноҳақликка чидаб туролмайдиган инсон эдингиз. Аёл бўла туриб, баъзи эркаклардан ортиқроқ мардлик қилдингиз”, деб ёзади актёр Ойбек Холмедов.

“Баъзи инсонларнинг ижтимоий тармоқларга ёзаётган изоҳларини кўриб, ранжидим. “Эй ғофил бандалар, қаерга қараяпмиз, нега биз инсоннинг фақат суратига, гапирган сўзларига қараб баҳо беряпмиз? Инсоннинг қалби, сийрати фақатгина Аллоҳга аён. Бугун сиз ёмон деётган инсон қиёматда сиздан-да азиз бўлиши мумкин. Ундан кўра қалбингизни ислоҳ қилинг”, деб ижтимоий тармоқларда Ҳалима Ибрагимова ҳақида негатив фикр билдирган инсонларга ўз муносабатини билдирди Лола Зуннунова.

Эслатиб ўтамиз, комик актриса Ҳалима Ибрагимова 7 декабрь куни 45 ёшида ҳаётдан кўз юмди. Хонанда Юлдуз Усмонованинг айтишича, унинг ўлимида жарроҳлик амалиётидан кейинги организмнинг ўзини тиклолмагани ва қонда қанд миқдорининг ошиши сабаб бўлган.