АҚШнинг Тошкентдаги элчихонаси Ўзбекистонда хотин-қизлар ва болалар ҳуқуқлари, эркинликлари ҳамда қонуний манфаатларини ишончли ҳимоя қилиш тизимини янада такомиллаштиришга доир қонун ҳужжати қабул қилинганини олқишлади.
“Ушбу қонун барча ўзбекистонликларнинг ўз жамоалари, иш жойлари ва уйларида ўзларини хавфсиз ҳис қилишларини таъминлаш йўлидаги муҳим қадамдир”, — дейилади элчихона баёнотида.
Таъкидланишича, АҚШ оиладаги зўравонлик қурбонларига ҳимоя ва қўллов олишда ёрдам беришга содиқ қолади ҳамда Ўзбекистон ҳуқуқ-тартибот органлари, суд тизими ва фуқаролик жамияти билан ушбу қонунни ҳаётга татбиқ этишда ҳамкорлик қилишга тайёрдир.
Ўзбекистонда аёллар ва вояга етмаганларни зўравонликдан ҳимоя қилишни таъминлашга қаратилган қонун 11 апрель куни имзоланди. Қонун имзолангани ҳақида эълон қилган Президент администрацияси шўба мудири Саида Мирзиёева “биз ниҳоят тажовузкорларни жавобгарликка тортиш орқали аёлларни оиладаги зўравонликдан ҳимоя қила оламиз”, деб айтганди.
Адлия вазири маслаҳатчиси, блогер Шаҳноза Соатова қонуннинг қабул қилиниши тарихий ҳодиса эканини қайд этганди. “Назаримда, ушбу қонуннинг қабул қилиниши тарихий бир ҳодиса. Умуман, қонун лойиҳаси бир йил давомида босиб ўтган йўлининг ўзи алоҳида бир тарих. Мана шу тарихга озми-кўпми гувоҳ бўлган, дахлдор бўлган инсон сифатида айтаманки, бу қонуннинг жамиятга етказаётган ўзгача бир янги муждаси бор. Яъни энди зўравонликка аввалгидек тоқат қилиб бўлмайди”, — деган эди у.
Изоҳ (0)