АҚШ давлат котиби Энтони Блинкен Украина ташқи ишлар вазири Андрей Сибига билан телефон орқали мулоқот қилди. Бу ҳақда Давлат департаменти расмийси Метю Миллер баёнотида айтилган.
Блинкен Вашингтоннинг Киевга ёрдами давом этишини қайд этди. Унинг таъкидлашича, бу айниқса қиш бошланишидан олдин муҳимдир. У, шунингдек, Украинага зарур қурол-яроғ ҳақида ҳам гапирган.
“Давлат котиби АҚШнинг Украинани барқарор қўллаб-қувватлаш бўйича мақсадларини белгилаб берди”, дейилади баёнотда.
Блинкен, шунингдек, Америка расмийларининг “Украинада суверенитет ва демократияни қўллаб-қувватлаш”, БМТ низоми тамойиллари асосида можаро ҳудудида тинчлик ўрнатиш мажбуриятини тилга олган.
Кеча 29 ноябрь куни CNN телеканали Дональд Трампнинг Украина бўйича тинчлик режаси тафсилотлари маълум бўлганини хабар берганди.
Унга кўра, Трамп яқинда Украина бўйича махсус элчи этиб тайинлаган Кит Келлогнинг таклифлари Трамп маъмурияти амалга оширишга ҳаракат қиладиган режа бўлиши мумкинлиги қайд этилган.
Режанинг моҳияти тезда сулҳга эришиш ва фронт чизиғини музлатиш, шундан сўнг ҳар икки томоннинг музокаралар столига ўтиришидан иборат. Аммо бундан кейин ишлар янада мураккаблашиши мумкин, деб ёзади CNN.
Изоҳ (0)