НАТО альянси Украинага F-16 қирувчи самолётларининг биринчи партиясини топширади. Бу ҳақда АҚШ давлат котиби Энтони Блинкен берган маълумотга асосланиб, Reuters нашри хабар берди.
Манбада айтилишича, F-16 самолётлари ҳозирда Дания ва Нидерландиядан Украинага олиб келинмоқда. Тез орада Киевда НАТО вакили иштирокида техникаларни топшириш тадбири ўтказилади.
Блинкен Вашингтондаги НАТО саммити доирасида сўзлаган нутқида яқин бир неча кун ичида Украина учун мустаҳкам пакет тақдим этилишини айтган. F-16 ларнинг берилиши Украинанинг НАТОга аъзолиги учун аниқ ва мустаҳкам кўприк қуриши хабар қилинган.
“Бу самолётлар Украина Россия агрессиясидан ўзини самарали ҳимоя қилишда давом этишига ишонч ҳосил қилиш учун шу ёзнинг ўзида Украина осмонида парвоз қила бошлайди”, — дейилади АҚШ давлат котиби баёнотида.
F-16 самолётлари улкан ҳужум салоҳияти туфайли узоқ вақтдан бери Украина ҳукуматининг диққат марказида бўлган. Қирувчи самолёт 20 миллиметрли тўп билан жиҳозланган бўлиб, бомба, ракета ва снарядларни олиб юра олади.
“Биз Украина осмонида замонавий қирувчи самолётларни кутиб олишга тайёрланяпмиз”, — деган Украина мудофаа вазири Рустем Умеров нидерландиялик ва даниялик ҳамкасблари билан учрашувдан сўнг Х ижтимоий тармоғида.
Келишувга кўра, Дания жами 19 та, Нидерландия эса 24 та F-16 самолёти етказиб беришга ваъда берган эди. Иккала давлат ҳам Украинани F-16 самолётлари билан таъминлаш бўйича халқаро коалицияни ҳаракатга келтирган.
НАТО аъзолари, шунингдек, Украинага ёрдам бериш учун қўшимча бешта Patriot ва бошқа стратегик ҳаво мудофаа тизимини етказиб беришини эълон қилган. Шарқий фронтда вазият ўзгаришига қараб ҳарбий узатмалар кўпайиши мумкинлиги билдирилган.
Изоҳ (0)